Read Свето Писмо (Гаврилова) 1990 Мудрост Сирахова 42 Bible Online

Мудрост Сирахова 42 - Свето Писмо (Гаврилова) 1990 bible

Мудрост Сирахова 42

¹Делата Божји. А не срамувај се, еве, од што и со лицемерство не греши;

²не срамувај се точно да го исполнуваш законот на Севишниот, од заветот и пресуда строга да изречеш над безбожник;

³да се расправаш со другар и со туѓинец, ниту да го делиш наследството со други;

⁴од точни мерки и мерења, од мала или од голема придобивка;

⁵од чесност при купување и продавање, од строго воспитување на деца и од казнување до крв на лош слуга.

⁶При љубопитна жена добро е да имаш печат, а каде што има многу раце, заклучувај.

⁷Ако даваш, давај со сметка и со мерење; бележи го и давањето и примањето.

⁸Не срамувај се да поучуваш глупав и неразумен и престарен што со млади се натпреварува. Тогаш ќе бидеш вистински воспитан и сите ќе те почитуваат.

⁹Ќерката за таткото е постојана грижа; грижата за неа сонот му го прогонува: во младоста — немажена да не остане, а кога ќе се мажи — мажот нејзин да не ја намрази;

¹⁰додека е девица, да не биде измамена и да не забремени во таткова куќа; кога се омажи — брачната верност да не ја наруши, а кога е веќе со мажот — да не остане неплодна.

¹¹Ако ќерката твоја е бесрамна, добро ја пази, срам да не ти донесе пред твоите непријатели; да не станеш за срам во градот и укор пред народот, пред луѓето да не те посрами.

¹²На човечка убавина не гледај и меѓу жени не седи.

¹³Како молецот што излегува од облеката, така лукавството излегува од жената.

¹⁴Подобро е и лош маж, отколку лицемерна жена, која може да ве посрами во однесувањето.

¹⁵Сега ќе ги спомнам делата Божји; што сум видел, за тоа ќе кажувам. Со зборови Господ ги создаде Своите дела:

¹⁶Светлото сонце сите ги грее, неговото дејство со слава Божја е полно.

¹⁷Господ ни на ангелите не им дал сила да говорат за сите Негови чуда, кои Тој, Бог Седржителот ги создал, та врз нив да стои цврсто вселената, што ја создал во Своја слава.

¹⁸Тој проникнува во бездната и во срцето, ги знае сите нивни тајни; Господ го има сето знаење: знае сѐ што постои и сите знаци на времето.

¹⁹Тој ги објавува минатото и иднината, ги открива трагите на она што е сокриено.

²⁰Ни една мисла не Го одминува; ни еден збор не е сокриен од него.

²¹Тој ги создал големите дела на Својата премудрост; Тој живее од век во век.

²²Тој не се зголемил ниту намалил; Тој не бара никаков советник.

²³Колку се пожелни Неговите дела, иако само како искри можеме да ги видиме.

²⁴Сѐ живее и трае додека за сите потреби и сѐ на Него Му се покорува.

²⁵А сѐ е двојно, едно спроти друго; ништо несовршено не создал Тој.

²⁶Едно од друго е подобро; кој може да се насити, гледајќи ја Неговата слава?