Read Свето Писмо (Гаврилова) 1990 Исаија 1 Bible Online

Исаија 1 - Свето Писмо (Гаврилова) 1990 bible

Исаија 1

¹Видение на Исаија, синот Амосов, кое го виде за Јудеја и Ерусалим, во деновите на јудејските цареви Озија, Јоатам, Ахаз и Езекија.

²Чујте, небеса, и слушај, земјо, зашто Господ вели: »Јас воспитав и подигнав синови, а тие се побунија против Мене.

³Волот го познава стопанот свој, и оселот — јаслите на господарот свој, а Израилот не Ме познава, Мојот народ не разбира.«

⁴Ах, народе грешен, народ претрупан со беззаконија, племе на злодејци и синови погубни! Го оставивте Господа, Го презревте Светецот Израилев, — се вративте назад.

⁵Каде уште да ве бијат вас, кои сѐ уште се противставувате? Целата глава ви е во рани, и целото срце ви е изнемоштено.

⁶Од главата до петите нема во тој народ здраво место, сињаци, гнојни рани, нечистени, непреврзани и неомекнати со елеј.

⁷Земјата ви е опустошена, градовите ви се изгорени со оган; нивите ваши пред ваши очи туѓинци ги јадат; и пустош е, како што запустуваат туѓинци.

⁸Остана ќерката Сионова како колиба во лозје, како сеница во градина, како опсаден град.

⁹Да не беше ни оставил Господ Саваот мал остаток, ќе бевме исто така како Содом, ќе заприлегавме на Гомор.

¹⁰Чујте го словото Господово, кнезови содомски, вслушај се во законот на нашиот Бог, народе гоморски!

¹¹»Зашто ми се многуте ваши жртви — вели Господ. Презаситен сум од сепаленици на овни и од маснотија на згоен добиток; крв од телиња, од јагниња и јариња не сакам.

¹²Кога доаѓате да се јавите пред лицето Мое, кој ви бара да ги газите дворовите Мои?

¹³Не принесувајте веќе суетни жртви; кадењето е одвратно за Мене; новомесечија, саботи и празнични собранија не можам да трпам: беззаконие — и празнувања...?

¹⁴Душата Моја ги мрази вашите новомесечија и вашите празници: тие се товар за Мене, тешко Ми е да ги носам.

¹⁵И кога протегате раце, Јас ги кријам од вас очите Свои, а кога ги умножувате молбите свои, Јас не слушам: рацете ваши се полни со крв.

¹⁶Измијте се, исчистете се; иставете ги од очите Мои лошите дела свои; престанете да правите зло;

¹⁷научете се да правите добро, барајте правда, спасувајте угнетен, заштитувајте сирак, застапувајте се за вдовица.«

¹⁸Тогаш дојдете и ќе се пресуди, вели Господ. Гревовите ваши да се и како бакам, — како снег ќе ги побелам; да бидат црвени и како пурпур, — како волна ќе станат бели.

¹⁹Ако Го барате и послушате, ќе ги јадете добрата земни;

²⁰ако, пак, не сакате и се противставувате, меч ќе ве истреби, тоа го рече устата Господова.

²¹Како правичниот верен град Сион стана блудница? Во него царуваше правда, а сега престојуваат убијци.

²²Среброто ти стана како згура, виното ти е со вода помешано;

²³твоите кнезови се престапници на законот и соучесници на крадци; сите тие сакаат подароци и лакомат за награда; не заштитуваат сирак, и поплака на вдовица не стигнува до нив.

²⁴Затоа вели Господ, Господ Саваот, Силниот Израилев: »О, ќе ја истурам јароста на противниците Свои и ќе им се одмаздам на непријателите Свои!

²⁵и ќе ја свртам против тебе раката Своја и како во пепелница ќе ја исчистам од тебе смешата и ќе го одделам од тебе сѐ што е оловно;

²⁶и пак ќе ти поставам судии, како порано, и советници како отпрвин; тогаш ќе говорат за тебе: град на правда, верна престолнина!

²⁷Сион ќе се спаси преку праведен суд, и обратените негови — преку правдата;

²⁸за сите отстапници и грешници — погибел, а оние, што го оставиле Господа, ќе бидат истребени.

²⁹Тие ќе бидат посрамени заради младите шуми, толку многу сакани од вас, ќе црвенеат од срам заради градините што сте си ги избрале;

³⁰зашто вие ќе бидете како дабот, чиј лист паднал и како градина, во која нема вода.

³¹И силниот ќе биде отпадок, а делото негово искра; ќе горат заедно, — и никој нема да ги угасне.«