Read Свето Писмо (Гаврилова) 1990 Исаија 17 Bible Online

Исаија 17 - Свето Писмо (Гаврилова) 1990 bible

Исаија 17

¹Пророштвото за Дамаск — ете, Дамаск се исклучува од бројот на градовите и ќе биде куп од урнатини.

²Градовите Ароирски ќе бидат напуштени, — ќе останат за стадата, што ќе си почиваат таму и нема да има кој да ги плаши.

³Нема да има повеќе Ефремова тврдина, ни дамаско царство и остатокот од Сирија; со нив ќе стане исто, што стана со славата на синовите Израилеви, вели Господ Саваот.

⁴Во оној ден ќе се намали славата на Јакова, и полното тело негово ќе ослабне.

⁵Исто онака ќе биде по собраното жито од жетварот, кога раката негова ќе ги ожнее класовите и кога ќе ги соберат класовите во Рефаимската долина.

⁶И ќе останат во него, како што станува при тресење маслинки, две — три зрна да остана на самиот врв или четири — пет на плодните гранки, вели Господ, Бог Израилев.

⁷Во оној ден ќе го сврти човек погледот свој кон својот Создател, очите негови ќе бидат управени кон Светецот Израилев;

⁸и нема да сврти очи кон жртвениците, дело на рацете свои; нема да го погледне она што го направиле прстите негови, идолите на Астарта и Ваал.

⁹Во оној ден утврдените негови градови ќе бидат како урнатини во гори и по планински врвови, оставени пред синовите Израилеви и сѐ ќе биде пусто.

¹⁰Зашто ти Го заборави Бога на твоето спасение, не се сеќаваше на карпата на твоето засолниште; затоа ти си уредил градини за веселби и си насадил прачки во туѓи лозја.

¹¹Во денот, кога садеше, ти се грижеше насаденото да расте, и посеаното од тебе да цути; но во денот кога ќе собираш, ќе нема куп жетва, туку голема жалост.

¹²О, шум од многу народи! Шумат тие како што шуми морето. Викање на племиња! Викаат тие како што рикаат бујните води.

¹³Викаат народите како што рикаат бујните води; но Он ги заплаши, — и тие избегаа далеку; беа разгонети како плева по планините од ветар и како прав од виор.

¹⁴Вечерта — и ете ти ужас, но пред утрото веќе го нема. Таков е делот на нашите грабачи, жребот за нашите разрушители.