Read Свето Писмо (Гаврилова) 1990 Исаија 23 Bible Online

Исаија 23 - Свето Писмо (Гаврилова) 1990 bible

Исаија 23

¹Пророштвото за Тир. — Плачете тарсиски кораби, зашто тој е разрушен: нема куќи и нема кој да влегува во куќите. Тоа им беше соопштено од земјата Китијска.

²Молкнете жители на островот, што го полнеа сидонските трговци, пловејќи по море.

³По големи води се пренесуваат во него житата на Сихор, жетвата на големата река; тој беше пазариште на народите.

⁴Засрами се, Сидоне: зашто, еве што вели морето, морската тврдина: како да не сум се мачела со родилни маки и да не сум раѓала, како да не сум одгледувала момци, ниту израснувала моми.

⁵Кога ќе стигне веста до Египјаните, тие ќе затреперат штом ќе чујат за Тир.

⁶Преселувајте се во Тарсис, плачете, жители на островот!

⁷Тоа ли е вашиот град кој ликува, чиј почеток е од древните дни? Нозете негови го носат, да се скита далеку во туѓина.

⁸Кој го одреди тоа за Тир, што раздаваше венци, чии купувачи беа кнезови, а трговците негови — најпрочуени во земјата?

⁹Господ Саваот го одреди тоа, за да посрами секоја горда слава, за да ги понизи сите најпрочуени во земјата.

¹⁰Оди по земјата своја, тарсиска ќерко, како реката: нема повеќе пречки.

¹¹Он ја протегна раката врз морето, затресе царства; Господ додаде повелба за Ханан — да ги разруши тврдините негови,

¹²и рече: »Нема повеќе да ликуваш, посрамена девице, ќерко Сидонска, оди во Китин, но и таму нема да имаш мир.«

¹³Ете ја земјата на Халдејците. Тој народ порано го немаше; Асур му стави почеток од пустински жители. Тие ги издигаа кулите свои, ги соборуваат дворците негови, го претвораат во урнатини.

¹⁴Плачете, кораби тарсиски, зашто вашата тврдина е разрушена.

¹⁵И во тој ден ќе го заборават Тир за седумдесет години, колку се деновите на еден цар. А по седумдесетте години ќе се пее за Тир, како што се пее за блудница:

¹⁶»Земи гитара, тргни по градот, блуднице заборавена! Свири убави, пеј многу песни за да се сеќаваат на тебе.«

¹⁷И ете, по седумдесет години Господ ќе го посети Тир; и тој пак ќе земе да ја добива печалбата своја и ќе блудствува со сите земни царства по целата вселена.

¹⁸Но трговијата негова и печалбата му ќе бидат посветувани на Господа; нема да бидат затворени и натрупани во клетови, зашто печалбата од трговијата негова ќе преминува на оние што живеат пред лицето на Господа, за да јадат до наситување и да имаат трајни облеки.