Read Свето Писмо (Гаврилова) 1990 Исаија 24 Bible Online

Исаија 24 - Свето Писмо (Гаврилова) 1990 bible

Исаија 24

¹Ете, Господ ја опустошува земјата и ја прави неплодна; го изменува нејзиниот вид и ги распрснува оние што живеат на неа.

²Со свештеникот ќе стане исто што и со народот, — со слугата, — исто што и со господарот негов; со слугинката, исто што — и со господарката нејзина; со купувачот, исто што и со продавачот; она што ќе стане со оној, кој ќе земе на заем, исто што, и со оној кој дава на заем; со оној, кој дава со интерес — исто и со оној кој зема под интерес.

³Земјата е опустошена до крај и сосема е разграбена, зашто Господ го изрече тоа слово.

⁴Тагува, нажалена е земјата; опаднала, тажна е вселената; опаднале оние, што се издигале над народот на земјата.

⁵И земјата е осквернета под жителите свои, зашто тие ги прекршија законите, го изменија уставот, го нарушија вечниот завет.

⁶Затоа проклетство ја јаде земјата, а жителите нејзини трпат казна; затоа се изгорени престојувалиштата земни, малку луѓе останаа.

⁷Плаче гроздовиот сок; боледува лозата; воздивнуваат сите што се веселеа од срце.

⁸Престана веселбата со тимпани; молкна вревата на оние што се веселеа; стивнаа звуците на гуслите;

⁹не пијат повеќе вино со песни; горчлив е сикерот за оние што го пијат,

¹⁰Разорен е запустениот град; сите куќи се затворени, не може да се влезе.

¹¹Плачат за вино по улиците; потемне секаква радост; изгонета е секаква веселба од земјата.

¹²Во градот остана само пустош, портите се искршени.

¹³А среде земјата, меѓу народите, ќе биде она истото, што станува кога маслинки тресат или пабирки од гроздобер.

¹⁴Тие ќе го кренат гласот свој, ќе ликуваат во величието на Господа, силно ќе воскликнуваат од морето.

¹⁵И така, славете го Господа на исток, по островите морски — славете Го името името на Господа, Бога Израилев.

¹⁶Од крајот на земјата слушаме песна: »Слава на Праведниот!« И реков јас: »Тешко мене, тешко мене! Злодејци зло вршат, на зол начин дејствуваат злодејците.

¹⁷Ужас, јама и стапица за тебе, жителе земни!«

¹⁸Тогаш, оној што избега од викот на ужасот, ќе падне во јама; и кој ќе излезе од јамата, ќе падне во стапица; зашто прозорците од небесната височина ќе се отворат, и основите земни ќе се разнишаат.

¹⁹Земјата се разрушува, земјата се распаѓа, земјата е силно разнишана;

²⁰земјата се ниша како пијан и се лула како лулка, и беззаконието ѝ теже врз неа; таа ќе падне — и повеќе нема да стане.

²¹И во тој ден Господ ќе ја посети војската на висините, ќе ги посети и земните цареви на земјата.

²²И ќе бидат собрани наедно како затвореници во затвор, и ќе бидат заклучени во темница и по многу денови ќе бидат казнети.

²³Тогаш месечината ќе поцрвени, и сонцето ќе се засрами, кога Господ Саваот ќе се зацари на гората Сион и во Ерусалим, и пред неговиот старешини ќе стане слава.