Read Свето Писмо (Гаврилова) 1990 Исаија 25 Bible Online

Исаија 25 - Свето Писмо (Гаврилова) 1990 bible

Исаија 25

¹Господи, Ти си Бог мој; ќе Ти возвеличам, ќе го восфалам името Твое, зашто си извршил премудри дела; определени во старо време и вистинити. Амин.

²Ти го претвори градот во грамада од камења, цврстата тврдина — во урнатини; нема повеќе во градот дворци на другоплеменици; никогаш нема да биде востановен.

³Затоа ќе Те прославуваат силните народи; градовите на страшните племиња ќе се плашат од Тебе;

⁴оти Ти беше прибежиште на сиромавиот, прибежиште на немоќниот во тешко време за него, заштита од бура, сенка од припек; зашто гневното дишење на насилниците прилегаше на бура против карпа.

⁵Ти го скроти бујствувањето на непријателите, како припек — во безводно место; веселбата на угнетувачите е задушена, како припек — во сенка од облак.

⁶И Господ Саваот ќе стави врз таа планина за сите народи трпеза со добри јадења, трпеза со чисти вина, со богати јадења од коски и најчисти вина;

⁷врз таа планина ќе ја уништи покривката, што ги покрива сите народи, покривка, која лежи врз сите племиња.

⁸Смртта ќе биде проголтана за секогаш, ќе ги избрише Господ Бог солзите од сите лица, и ќе го симне срамот од Својот народ во целата земја, зашто така вели Господ.

⁹И ќе речат во тој ден: »Еве, Он е нашиот Бог! На Него се надевавме, и Он нѐ спаси! Он е Господ; Него Го чекавме; да се возрадуваме и развеселиме за спасението од Него!

¹⁰Оти раката на Господа ќе почива врз таа планина, и Моав ќе биде прегазен на местото свое, како што се гази слама на буниште.«

¹¹И макар што ги размавна среде него рацете Свои, како што ги размавнува оној што плива, но Бог ќе ја понизи гордоста негова заедно со лукавството на рацете негови.

¹²И ќе ја собори, ќе ја разруши тврдината со твоите високи ѕидишта, ќе ја кутне на земја, во прав.