Read Свето Писмо (Гаврилова) 1990 Исаија 32 Bible Online

Исаија 32 - Свето Писмо (Гаврилова) 1990 bible

Исаија 32

¹Ете, царот ќе царува по правда, а кнезовите ќе управуваат по закон;

²секој од нив ќе биде како заштита од ветар и засолниште за лошо време, како водни извори во степи, како сенка од висока карпа во жедна земја.

³И очите на оние што гледаат нема да бида закривани; ушите на оние што слушаат, ќе внимаваат.

⁴И срцето на лесномислените ќе умее да расудува; оние што говорат на нос, ќе говорат јасно.

⁵Простакот нема повеќе да го нарекуваат чесен, а за подмолниот нема да велат дека е честит.

⁶Зашто простакот говори глупости и срцето негово мисли на беззаконие, за да дејствува лицемерно и да искажува хула проти Господа, да ја лишува од леб душата на гладниот и да го одзема пиењето од жедниот.

⁷Кај подмолниот и средствата се погибелни: тој прави стапици, за да го погуби сиромавиот со лажливи зборови, макар што сиромавиот и да е прав.

⁸А чесниот мисли на чесното и цврсто стои во сѐ што е чесно.

⁹Жени безгрижни, застанете, чујте го гласот мој; ќерки немирни, приклонете го увото кон зборовите Мои.

¹⁰Уште една година и неколку дена, и ќе се ужаснете вие, безгрижни! Гроздобер нема да има и време за жетва нема да настане.

¹¹Стреснете се вие, безгрижни! Ужаснете се вие, невнимателни! Соблечете се, оголете се и крстот препашете го.

¹²Ќе се бијат во гради за прекрасните полиња, за родната лоза.

¹³Во земјата на народот Мој ќе растат трње и боцки; така ќе биде и во сите домови во градот што ликува;

¹⁴зашто дворците ќе бидат оставени, шумниот град ќе биде напуштен; Офел и кулата ќе станат место пештери — прибежеште на диви осли и на стада што пасат.

¹⁵Додека не се излие врз нас Духот одозгора, и пустињата не стане градина, и градината не почнат да ја сметаат за шума.

¹⁶Тогаш ќе се воведе суд во таа пустиња, и правда ќе преуспева во плодоносното поле.

¹⁷Дело на правдата ќе биде мирот, и плод на правосудството — спокојство и безопасност засекогаш.

¹⁸Тогаш народот Мој ќе живее во мирни живеалишта и во безопасни села и во пребивалишта на блажените.

¹⁹И град ќе паѓа врз гората; градот ќе слезе во долината.

²⁰Блажени сте вие, што сеете при сите води и што испраќате таму и вол и осел.