Read Свето Писмо (Гаврилова) 1990 Исаија 40 Bible Online

Исаија 40 - Свето Писмо (Гаврилова) 1990 bible

Исаија 40

¹Утешувајте го, утешувајте го Мојот народ, вели вашиот Бог;

²говорете му на Ерусалим, што му е по срце, и известувајте го, дека времето на неговата борба се исполни, дека за неправдата му е дадено задоволување, зашто од раката Господова доби двојно за сите свои гревови.

³Гласот на оној што вика во пустињата говори: »Пригответе Му пат на Господа, прави направете ги во пустињата патеките за нашиот Бог;

⁴секој дол да се исполни, секоја планина и рид да се снизат; кривините да се исправат, и нерамните патишта да бидат израмнети;

⁵и ќе се јави славата Господова, и секоја плот ќе го види спасението од Бога; зашто устата Господова го изрече тоа.«

⁶Гласот говореше: »Разгласувај!« и рече: »Што да разгласувам?« — »Секоја плот е трева, сета убавина нејзина е како полско цвеќе.

⁷Тревата се исушува, цвеќето овенува, штом ќе дувне врз него здивот на Господа: така е и народот како трева.

⁸Тревата се суши, цвеќето свенува, а словото на нашиот Бог останува вечно.«

⁹Искачи се на високата гора Сион, ти кој јавуваш добри вести за Сион, извиши го силно гласот свој, благоизвестителе Ерусалиме, подигни го, не плаши се. Кажи им на градовите Јудини: еве Го вашиот Бог!

¹⁰Ете, Господ Бог иде со сила и мишката Негова е со власт. Ете, наградата Му е со Него, а отплатата Му е пред лицето Негово.

¹¹Како пастир ќе го пасе Он стадото Свое: јагнињата ќе ги земе Он во рацете и ќе ги носи на градите Свои, и грижливо ќе ги води дојдените.

¹²Кој ги исцрпел водите со раката своја и со педа го измерил небото, и со мерка го измерил правот земен, кој ги измерил на терезија планините и ридовите?

¹³Кој го разбрал Духот на Господа, и Му бил Нему советник и Го учел?

¹⁴Со кого се советувал Он, и кој Го вразумувал и Го поучувал во патот на правдата, и Го учел на знаење и Му го покажувал патот на мудроста?

¹⁵Ете, народите се како капка од ведро, и се сметаат како прашинка на терезија. Ете, островите Он ги подигна како прашинки.

¹⁶Ни Ливан не стигнува за жртвен оган, ни животните по него — за сепаленица.

¹⁷Сите народи пред Него се како ништо, — за Него се помалку од ништо, и помалку се од суетата.

¹⁸И така, со кого ќе Го споредите Бога, и каква подобност ќе Му најдете?

¹⁹Уметникот го излева идолот, а златарот го покрива со злато и му додава сребрени веришки.

²⁰А кој е сиромав и нема што да му принесе, тој избира дрво, кое не гние, па бара искусен уметник за да направи идол, што ќе стои цврсто.

²¹Зар не знаете? Зар не сте слушале? Зар не ви е зборувано во почетокот? Зар не сте го разбрале тоа по основите на земјата?

²²Он е Оној, Кој седи над кругот на земјата, а оние, што живеат на неа, се како скакулци пред Него; Он ги распослал небесата како танко платно и ги распнал како шатор за живеење.

²³Он ги претвора кнезовите во ништо, судиите земни ги прави да бидат ништожни.

²⁴Одвај посадени, одвај посеани, одвај се закоренил во земјата стракот нивни, штом Он ќе дувне врз нив, тие се исушуваат; виорот ги однесува како плева.

²⁵»Со кого ќе Ме изедначите и со кого ќе Ме споредите?« — вели Светецот.

²⁶Кренете ги очите свои кон висините небесни и погледнете, кој ги создал? Кој го пресметал бројот на војската нивна? Он сите нив ги нарекува по име: поради големата моќ и големата сила во Него ништо не недостига.

²⁷А како говориш ти, Јакове, и велиш, Израиле: »Патот ми е сокриен од Господа, делото мое е заборавено пред мојот Бог?«

²⁸Зар не знаеш? Зар не си слушал дека вечниот Господ Бог, Кој ги создал краиштата на земјата, не се изморува и не изнемоштува; Неговиот разум е неиспитлив.

²⁹Он му дава сила на уморениот и му дарува јачина на изнемоштениот.

³⁰Се уморуваат и момчињата и ослабуваат, и млади луѓе паѓаат,

³¹а оние кои се надеваат на Господа, ќе ја обноват силата своја: ќе кренат крилја како орли, ќе трчаат и нема да им биде тешко, ќе одат и нема да се уморат.