Read Свето Писмо (Гаврилова) 1990 Исаија 42 Bible Online

Исаија 42 - Свето Писмо (Гаврилова) 1990 bible

Исаија 42

¹Еве го Мојот Слуга, Кого Го држам за рака, Мојот Избраник, кон Кого благоволи душата Моја. Ќе го положам Духот Свој врз Него, и Он ќе им биде суд на народите;

²нема да викне, ниту да го подигне гласот Свој, нема да дозволи да го чујат на улиците;

³скршената трска нема да ја здроби, и ленот што тлее нема да го угасне; ќе суди според вистината;

⁴нема да ослабне, ниту ќе изнемошти, додека на земјата не утврди суд, народите ќе се надеваат на Неговиот закон.

⁵Така вели Господ Бог, Кој ги создал небесата и нивното пространство, Кој ја раширил земјата со нејзините производи, Кој му дава здив на народот што е на неа, и дух на оние што одат по неа.

⁶Јас, Господ, Те повикав во правда, цврсто ќе Те држам за рака и ќе Те пазам, ќе те поставам за завет на народот, светлина за незнабошците,

⁷за да им ги отвориш очите на слепите, да ги изведеш врзаните од затвор и оние што седат во темнина — од темнина.

⁸Јас сум Господ, тоа е Моето име, и нема да ја дадам славата Своја на друг, ниту честа Своја на идоли.

⁹Ете, претскажаното порано се зби, и ново ќе известам; пред да стане тоа, Јас ќе ве известам.

¹⁰Пејте Му на Господа нова песна, похвална за Него од земните краишта, вие што пловите по море, и сѐ, што го полни, островите и оние што живеат на нив.

¹¹Нека издигне глас пустињата и нејзините градови, населбите, каде што живее Кидар; нека ликуваат оние што живеат во карпи, нека воскликнуваат од врвовите горски.

¹²Нека Му воздадат слава на Господа, похвалата Негова нека ја возвестат на островите.

¹³Господ ќе излезе како исполин, ревноста ќе ја возбуди како војник; ќе извика и ќе подигне војнички вик; ќе се покаже силен против непријателите Свои.

¹⁴Долго молчев Јас, трпев и се воздржував; сега ќе викам како родилка, ќе разурнувам и ќе голтам сѐ.

¹⁵Ќе опустошувам планини и ридови, и сета нивна трева ќе ја исушам; реките ќе ги направам острови, езерата ќе ги исушам.

¹⁶Ќе ги поведам слепите по пат, што тие не го знаат, ќе ги водам по нејзини патеки, темнината ќе ја направа светлина пред нив, а кривите патеки — прави: ете, што ќе направам Јас за нив, и нема да ги оставам.

¹⁷Тогаш ќе се свртат назад и со голем срам ќе се покријат оние, што се надеваат на идоли, кои им велат на идолите: вие сте наши богови.

¹⁸Слушајте, глуви, и гледајте, слепи, за да видите.

¹⁹Кој е толку слеп како што е Мојот слуга, и глув, како што е Мојот пратеник? Кој е толку слеп како што е возљубениот, кој е така слеп, како што е слугата Господов?

²⁰Ти си видел многу, но не си забележувал; ушите ти биле отворени, но не си слушал.

²¹На Господа му било угодно заради правдата Своја да го возвеличи и прослави законот.

²²Но тоа е народ поробен и разграбен; сите тие се врзани во подземја и сокриени во темници; станале плен, и нема спасител, ограбени се, и никој не вели: врати го!

²³Кој од вас го приклонил увото кон тоа, кој викнал и го слушал за иднината?

²⁴Кој го предаде Јакова на разурнување и Израилот — на грабачи? Не е ли тоа Господ, против Кого згрешивме? Тие не сакаат да одат по патиштата Негови, ниту го слушаат законот Негов.

²⁵А Он ја излеа врз нив јароста на Својот гнев и жестокоста на војната: ти ги опкружи со пламен од сите страни, но тие не забележуваа; гореше во нив, но тие не го разбраа тоа со срце.