Read Свето Писмо (Гаврилова) 1990 Исаија 48 Bible Online

Исаија 48 - Свето Писмо (Гаврилова) 1990 bible

Исаија 48

¹Слушај го ова, доме Јаковов, вие, кои се нарекувате со името на Израилот и кои сте произлегле од Јуда, кои се колнете во името Господово, го спомнувате Бога Израилев, иако не по вистина и не по правда.

²Зашто тие се нарекуваат по светиот град и се потпираат на Бога Израилев; Господ Саваот е името Негово.

³Поранешното Јас однапред го кажував, и она што од устата Моја излегуваше и Јас го навестував и брзо го вршев, — и сѐ се извршуваше.

⁴Јас знаев, дека ти си упорен и дека во твојот врат има железни жили, и челото ти е бакарно;

⁵затоа и ти јавував од рано, пред да се случи тоа, и ти навестував, за да не речеш: »Мојот идол го направи тоа, мојот идол и мојот излеан лик заповеда тоа да стане.«

⁶Ти си слушал — погледај го сето тоа! И зар нема да го признаете тоа? А сега те известувам за нешто ново и сокриено, што ти не си го знаел.

⁷Тоа се изврши сега, а не одамна и не пред еден ден, и ти не си слушал за него, за да не кажеш: »Ете, јас го знаев тоа.«

⁸Ти не си слушал, ниту си знаел за тоа, и увото твое порано не беше отворено; зашто Јас знаев, дека ти ќе постапиш вероломно; од самата мајчина утроба си наречен отстапник.

⁹Заради името Свое го одлагав Својот гнев и заради славата Своја се воздржував да не те истребам.

¹⁰Ете, те растопив, но не како сребро, те испитав во печката на страдањата.

¹¹Заради Себе, заради Самиот Себе го вршам тоа, — зашто, каква навреда би била за името Мое! Славата Своја нема да ја дадам на друг.

¹²Чуј Ме, Јакове и Израиле, повикан од Мене: Јас сум истиот, Јас сум првиот и Јас последниот.

¹³Мојата рака ја основа земјата, Мојата десница го распростре небото; ќе ги повикам, — и тие ќе застанат заедно.

¹⁴Соберете се сите и слушајте: кој од нив го претскажал ова? Господ го возљуби, и тој ќе ја исполни волјата Негова над Вавилон и ќе ја јави мишката Своја над Халдејците.

¹⁵Јас, Јас реков, и го повикав; Јас го доведов, патот негов ќе биде успешен.

¹⁶Пристапете кон Мене, слушајте го ова: Јас и во почетокот говорев не тајно; од она време, откако се извршува тоа, Јас бев таму; и сега Ме испрати Господ Бог и Неговиот дух.

¹⁷Вака вели Господ, твојот Искупител, Светецот Израилев: Јас сум Господ, Бог твој, Кој те учи на добро, Кој те води по оној пат, по кој треба да одиш.

¹⁸О, да беше ги слушал Моите заповеди! Тогаш твојот мир ќе беше како река, и твојата правда — како морски бранови.

¹⁹И твоето потомство би било како песок, а породот од утробата твоја, — како зрнцата негови: името твое не би се истребило нити избришало пред Мене.

²⁰Излегувајте од Вавилон, бегајте од Халдејците, со радосен глас разгласувајте и проповедајте го тоа, ширете ја таа вест до крајот на земјата; кажувајте: »Господ го откупи Својот слуга Јакова.«

²¹Не ожеднуваат тие во пустињите, преку кои ги води: Он им извади вода од камен; пресекува карпа, — и се леат води.

²²А за лошите нема мир, вели Господ.