Read Свето Писмо (Гаврилова) 1990 Исаија 49 Bible Online

Исаија 49 - Свето Писмо (Гаврилова) 1990 bible

Исаија 49

¹Слушајте Ме, острови, и внимавајте, народи далечни: Господ Ме повика уште од утробата, од мајчината Ми утроба го нарече името Мое;

²ја направи устата Моја како остар меч: под сенката на раката Своја Ме криеше и Ме направи изострена стрела; во Својата торба за стрели Ме чуваше;

³Он Ми рече: »Ти си Мој слуга, Израиле, — во тебе ќе се прославам.«

⁴Јас, пак, реков: »Напразно сум се трудел, за ништо и попусто сум ја истрошувал силата Своја.« Но правото Мое е во Господа, и наградата Моја е во Мојот Бог.

⁵А сега вели Господ, Кој уште од утробата ме направи слуга Свој, да го вратам кон Него Јакова, за да се собере при Него Израилот; а кога ќе се собереме, ќе се прославам во Господа и Мојот Бог ќе биде сила Моја.

⁶И Он рече: »Малку е, тоа што Ти ќе ми бидеш слуга, за да се подигне племето Јаковово и да се поврати остатокот Израилев, туку Јас ќе те направам светило за народите, за да се рашири спасението од Господа до краиштата на земјата.«

⁷Така вели Господ, Искупителот на Израилот, Светецот негов, на презираниот од сите, на прекоруваниот од народот, на слугата на силните: цареви ќе Те видат и ќе станат; кнезовите ќе се поклонат заради Господа, Кој е верен, заради Светецот Израилев, Кој Те избрал.

⁸Вака вели Господ: »Во благопријатно време Те чув и во денот на спасението Ти помогнав; и Јас ќе те пазам и ќе Те направам завет на народот, за да ја востановиш земјата, да им ги вратиш на наследниците опустошените наследства.

⁹Да им кажеш на затворените: излезете, и на оние, што се во темнина: покажете се. Крај патиштата ќе пасат тие, по сите ридови ќе бидат нивните пасишта;

¹⁰Нема да трпат глад и жед, нема да ги удри припек и сонце; зашто Оној, Кој ги милува, ќе ги води и ќе ги доведе при извори водни.

¹¹И сите Мои гори ќе ги направам друмови, Моите патишта ќе бидат издигнати.

¹²Ете, едни ќе дојдат оддалеку; и ете — едни од север и од морето, а други — од земјата Синим.«

¹³Радувајте се, небеса, и весели се, земјо; воскликнувајте од радост гори, зашто Господ го утеши Својот народ и ги помилува Своите страдалници.

¹⁴А Сион велеше: »Ме остави Господ, мојот Бог ме заборави!«

¹⁵Може ли жена да го заборави породот свој, а да не се смилува на чедото од утробата своја? А и кога би го заборавила, Јас тебе нема да те заборавам.

¹⁶Ете, на Своите дланки сум те забележал; твоите ѕидишта секогаш се пред Мене.

¹⁷Твоите синови ќе побрзаат кон тебе, а твоите разурнувачи и опустошители ќе си отидат од тебе.

¹⁸Крени ги очите и погледај наоколу, — тие сите се собираат, доаѓаат кон тебе. Жив сум Јас! вели Господ, — со сите нив ќе се облечеш како со накит и ќе се промениш со нив како невеста.

¹⁹Зашто твоите урнатини, твоите пустињи и твојата разорена земја сега ќе бидат многу тесни за жителите, за оние, што те голтаа, ќе си отидат од тебе.

²⁰Децата, што ќе ги имаш, бидејќи си ги изгубила поранешните, ќе ти говорат гласно: »Тесно е местото за мене; отстапи ми, за да можам да живеам.«

²¹И ти ќе речеш во срцето свое: кој ми ги роди? Јас бев бездетна и бесплодна, одведена во плен и оддалечена; но, кој ги одгледа — ете, јас си останувам сама; а тие каде беа?

²²Вака вели Господ Бог: »Ете, ќе ја кренам раката Своја кон народите, ќе го издигнам знамето Свое пред племињата, — и ќе ги донесат синовите твои на раце и ќерките твои — на раменици.

²³И царевите ќе бидат твои хранители, и нивните царици ќе бидат твои доилки; со лицето до земјата ќе ти се клањаат и ќе го лижат правот од нозете твои, и ќе дознаеш, дека сум Јас Господ, дека оние, што се надеваат на Мене, нема да се посрамат.

²⁴Може ли да се одземе плен од силен, и можат ли да се одземат заробени од победникот?«

²⁵Да, така вели Господ: и секој заробен од исполин ќе биде одземен и грабежот од тиранинот ќе биде вратен; зашто Јас се борам со твоите противници и ќе ги спасам твоите синови;

²⁶ќе ги нахранам твоите угнетувачи со нивното сопствено месо, ќе бидат напоени со својата крв како со ново вино; и секое тело ќе дознае, дека Јас сум Господ, твој Спасител и твој Искупител, Силниот Бог Јаковов.