Read Свето Писмо (Гаврилова) 1990 Исаија 52 Bible Online

Исаија 52 - Свето Писмо (Гаврилова) 1990 bible

Исаија 52

¹Дигни се, дигни, облечи се во силата своја, Сионе! Облечи се во облеката на величието свое, Ерусалиме, свети граде! Зашто отсега нема повеќе да влегува во тебе необрезан и нечист.

²Истреси го од себе правот; стани, заробени Ерусалиме! Симни ги веригите од вратот свој, заробена ќерко Сионова!

³Зашто вака вели Господ: »За ништо бевте продадени, и без сребро ќе бидете откупени.«

⁴И уште вака вели Господ Бог: »Народот Мој одеше порано во Египет, за да поживее таму, а Асур го притеснуваше без причина.

⁵А сега што имам тука« — вели Господ: »Народот Мој е земен со дар, владетелите нивни беснеат, вели Господ, и постојано, секој ден, името Мое се навредува.

⁶Затоа Мојот народ ќе го познае името Мое; затоа ќе разбере во оној ден, дека Јас сум истиот, Кој вели: ‚еве Ме!‘«

⁷Колку се прекрасни врз горите нозете на благовесникот, кој навестува мир, благовестува радост, проповеда спасение, кој му говори на Сион: »Твојот Бог се зацари!«

⁸Ете го гласот на твоите стражи! Тие кренаа глас, и сите заедно ликуваат, зашто со очите свои гледаат, дека Господ се враќа во Сион.

⁹Веселете се, пејте заедно, урнатини ерусалимски, зашто Господ го утеши народот Свој — го откупи Ерусалим.

¹⁰Ја засука Господ Својата света мишка пред очите на сите народи, — и сите краишта земни ќе го видат спасението од нашиот Бог.

¹¹Одете си, одете си, излезете оттаму; не допирајте се до нечисто; излезете од средината негова, очистете се, вие што ги носите садовите Господови!

¹²Зашто нема да излезете набргу и нема да избегате; оти пред вас ќе тргне Господ, и Бог Израилев ќе биде зад вас.

¹³Ете, Мојот слуга ќе успее, ќе се воздигне, ќе се возвиси и возвеличи.

¹⁴Како што мнозина беа зачудени, гледајќи во Него — толку ликот Негов беше обезличен повеќе, отколку на секој човек, и видот Негов — повеќе, отколку на синовите човечки, — !

¹⁵така ќе зачуди многу народи, цареви ќе ја затвораат пред Него устата своја, зашто ќе го видат она, за кое не им било говорено, и ќе го дознаат она што не го слушнале.