Read Свето Писмо (Гаврилова) 1990 Исаија 60 Bible Online

Исаија 60 - Свето Писмо (Гаврилова) 1990 bible

Исаија 60

¹Дигни се, светлеј се Ерусалиме, зашто дојде твојата светлина, и славата Господова изгреа над тебе.

²Зашто, ете, темнина ќе ја покрие земјата, и мрак — народите; а над тебе ќе засветли Господ, и славата Негова ќе се јави над тебе.

³И народите ќе дојдат кон твоето видело, царевите — кон светлината што изгрева над тебе.

⁴Крени ги очите и погледај наоколу: сите тие се собираат, идат при тебе; твоите синови ќе дојдат од далеку, и твоите ќерки на раце ќе се носат.

⁵Тогаш ќе видиш и ќе се зарадуваш, и срцето твое ќе затрепери и ќе се рашири, зашто богатството на морето ќе се сврти кон тебе, имотот на народите ќе дојде при тебе.

⁶Множество камили ќе те покријат, едногрби камили од Мадаим и Ефа; сите тие ќе дојдат од Сава, ќе донесат злато и темјан и ќе ја објавуваат славата Господова.

⁷Сите кидарски стада ќе бидат собрани при тебе; овните навајотски ќе ти послужат: ќе излезат на жртвеникот Мој како благоугодна жртва, а Јас ќе го прославам домот на Мојата слава.

⁸Кои се тие што летаа како облаци, и како гулаби — кон гулабарниците свои?

⁹Така, Мене Ме чекаат островите и пред нив — тарсиските кораби, за да ги пренесат синовите твои оддалеку и со нив — сребро нивно и злато нивно, во името на Господа, твојот Бог, и на Светецот Израилев, зашто Он те прослави.

¹⁰Тогаш синовите на другоземци ќе ги градат ѕидовите твои, и нивните цареви — ќе ти служат; зашто во гневот Свој те поразував, но во благоволението Свое ќе бидам милостив кон тебе.

¹¹Твоите порти секогаш ќе бидат отворени, нема да се затвораат ни дење, ни ноќе, за да се принесува при тебе имотот на народите и да се доведуваат нивните цареви.

¹²Зашто народот и царствата, кои нема да сакаат да ти служат, ќе загинат, и а таквите народи сосема ќе бидат истребени.

¹³Славата на Ливан ќе дојде при тебе со кипарис, бор и кедар заедно, за да го украси местото на Моето светилиште, — а Јас ќе го прославам подножјето на нозете Свои.

¹⁴И ќе дојдат при тебе со покорност синовите на оние, што те измачуваа, ќе ти се клањаат пред нозете твои сите што те презираа; ќе те наречат град на Господа, Сион на Светецот Израилев.

¹⁵Затоа што беше изоставен и намразен, така што никој не минуваше преку тебе, — Јас ќе те направам вечна слава, и радост од род во род.

¹⁶Ти ќе се наситуваш од млекото на народите, и ќе смукаш од царски гради, и ќе познаеш дека Јас, Господ, сум твој Спасител и твој Искупител, Силниот Јаковов.

¹⁷Место бакар ќе ти испраќам злато, место железо — сребро, и место дрво — бакар, а место камења — железо; и ќе го поставам мирот за твој управител и правдата — за твои надзорници.

¹⁸Нема повеќе да се слуша за насилство во земјата твоја, ниту опустошување и разурнување — во пределите твои; и ѕидовите свои ќе ги нарекуваш спасение и портите свои — слава.

¹⁹Нема повеќе сонцето да ти биде видело на денот, ниту сјајот на месечината — ќе ти свети; Господ ќе ти биде вечна светлина, и твојот Бог — твоја слава.

²⁰Нема да заоѓа веќе твоето сонце, ниту твојата месечина ќе се потемнува, зашто Господ ќе ти беде вечна светлина; ќе се свршат дните на твоето тагување.

²¹И сиот народ твој ќе биде праведен, засекогаш ќе ја наследи земјата, — фиданка од она што сум го посадил, дела на рацете Мои, за Мое прославување.

²²Од мал народ ќе се намножат илјади, од најслабиот — силен народ. Јас, Господ, ќе побрзам да го завршам тоа навреме.