Read Свето Писмо (Гаврилова) 1990 Исаија 64 Bible Online

Исаија 64 - Свето Писмо (Гаврилова) 1990 bible

Исаија 64

¹О, да беше ги раскинал Ти небесата и да беше слегол! Горите би се стопиле од лицето Твое,

²како оган што растопува восок, како од оган што вода зовира, така ќе го познаат името Твое напријателите и од Твоето лице ќе затреперат народите.

³Кога вршеше страшни дела, од нас неочекувани, и слегуваше, — гори се топеа од Твоето лице.

⁴Зашто од секогаш не бевме слушале, не бевме внимавале со увото, и никое око не беше видело друг бог, освен Тебе, којшто направил толку многу за оние, кои на Него се надеваат.

⁵Ти милостиво го пресретнуваше секого, кој се радуваше и кој вршеше правда, кој Те спомнуваше на Твоите патишта. Но, ете, Ти се разгневи, зашто ние одамна грешевме; па како тогаш ќе бидеме спасени?

⁶Сите ние станавме како нечист човек, и секоја наша правда — како извалкана облека; сите попаѓавме како лист; а беззаконијата наши како ветар нѐ однесуваат.

⁷Нема никој кој би го повикувал Твоето име, кој би установил да се држат здраво за Тебе: затоа Ти го сокри лицето Свое од нас и нѐ остави да гинеме од беззаконијата свои.

⁸Но сега, Господи, Ти си наш Отец; ние сме глина, а Ти — наш грнчар, сите сме дело на Твоите раце.

⁹Немој да се гневиш безмерно, Господи, и немој вечно да го помниш беззаконието. Но, погледај: сите сме Твој народ.

¹⁰Градовите на Твојата светиња станаа пустелија; пустиња стана Сион; Ерусалим е опустошен.

¹¹Домот на нашата светиња и на нашата слава, каде што татковците наши Те прославуваа, од оган изгоре, а сите наши добра така пропаднаа.

¹²По сево ова, ќе се воздржуваш ли уште, Господи, ќе молчиш ли и ќе нѐ казнуваш ли без мерка?