Read Свето Писмо (Гаврилова) 1990 Исаија 8 Bible Online

Исаија 8 - Свето Писмо (Гаврилова) 1990 bible

Исаија 8

¹И ми рече Господ: »Земи си голем свиок и напиши на него со човечко писмо: брз на плен и итар на грабеж.

²И си зедов верни сведоци: свештеникот Урија и Захарија, синот Варахиев,

³и пристапив кон пророчицата, и таа зачна и роди син. И ми рече Господ: дај му име: брз на плен и итар на грабеж; шах — баз;

⁴зашто, пред да се научи детето да изговара: тате, мамо, — богатството на Дамаск и пленот самариски ќе бидат претставени пред асирскиот цар.«

⁵И продолжуваше да ми зборува Господ и рече:

⁶»Зошто овојј народ ги занемарува водите на Силоам, оти течат тивко, и се восхитува на Ресина, и од синот Ремалиев,

⁷Господ ќе ги испрати врз него бурните и големите води на реката — асирскиот цар со сета негова слава; ќе се надигне таа во сите свои ракави и ќе се излие преку сите свои брегови;

⁸и ќе навлезе во Јудеја, ќе ја наводни и високо ќе се крене — ќе стигне до вратот; и раширените крила нејзини ќе бидат по целата ширина на Твојата земја, Емануиле!«

⁹Здружувајте се, народи, но ќе бидете уништени, и внимавајте вие сите што сте далечни земји! Вооружувајте се, но ќе бидете победени; вооружувајте се, но ќе бидете уништени!

¹⁰Кројте заговори, но тие ќе се рушат, говорете збор, но тој нема да си исполни, зашто со нас е Бог!

¹¹Зашто вака ми велеше Господ, држејќи ја врз мене цврстата рака и опменувајќи ме да не одам по патот на тој народ, велејќи:

¹²»Не нарекувајте го заговор сето она што тој народ го нарекува заговор; и не плашете се од она, од кое тој се плаши, не стравувајте.

¹³Господа Саваота — Него свето почитувајте Го, и Он да биде ваш страв и ваш трепет!

¹⁴Он ќе биде осветување и камен за сопнување и карпа за соблазна на двата дома Израилеви, стапица и мрежа за жителите ерусалимски.

¹⁵И мнозина од нив ќе се сопнат и ќе паднат, ќе се разбијат, ќе се заплеткаат во стапицата и ќе бидат уловени.«

¹⁶»Врзи го свидетелството и запечати го откровението пред своите ученици.«

¹⁷И така, јас се надевам на Господа, Кој го сокрил лицето Свое од домот Јаковов, на Него се надевам.

¹⁸Ете, јас и децата што ми ги даде Господ, сме како белези и докази во Израилот од Господа Саваот, Кој живее на гората Сион.

¹⁹И кога ќе ви речат: »Обрнете се кон оние, што извикуваат мртовци, и кон маѓесници, кон бајачи и оние што говорат од стомак, тогаш одговарајте: не треба ли народот да се обрнува кон својот Бог? Се прашуваат ли мртви за живи?«

²⁰Допрашај се до законот и откровението! Ако некои речат дека не е така, тогаш за нив нема светлина.

²¹Ќе скитаат тие по земјата, жестоко угнетувани и гладни; и во време на гладта ќе се лутат, ќе го навредуваат својот цар и својот Бог.

²²И ќе се загледаат угоре, и ќе погледаат кон земјата; и ете — скрб и мрак, густа темнина; и ќе бидат фрлени во темнината. Но нема секогаш да има мрак таму, каде што сега тој е згустен.