Read Свето Писмо (Гаврилова) 1990 Левит 22 Bible Online

Левит 22 - Свето Писмо (Гаврилова) 1990 bible

Левит 22

¹И му рече Господ на Мојсеја, велејќи:

²»Кажи му на Арона и на синовите негови да постапуваат внимателно со светите приноси од синовите Израилеви и да не го осквернуваат Моето свето име во тоа, што Ми го посветуваат. Јас сум Господ.

³Кажи им: ако некој во целото ваше потомство во вашите родови има на себе некаква нечистотија и пристапи кон светите дарови, што синовите Израилеви Му ги посветуваат на Господа, да се истреби таа душа од пред Мене. Јас сум Господ, вашиот Бог.

⁴Оној човек од семето Ароново, кои е лепрозен, или има излив на семе, да не јаде од светите дарови сѐ додека не се исчисти, и кој се допре до нешто нечисто од мртовец, или кому му се случи излив на семе при спиење,

⁵или кој ќе се допре до некој гад, па се оскверни, или до човек од кого се оскверни од каква и да било нечистотија,

⁶тој што се допрел до тоа да биде нечист до вечерта и да не јаде од светите приноси, пред да го измие целото свое тело со вода;

⁷но, штом зајде сонцето, да биде чист, тогаш да јаде од осветените дарови, бидејќи тоа е негова храна.

⁸Мрша или ѕверојадина тој да не јаде, за да не оскверни од нив. Јас сум Господ.

⁹Нека ги пазат заповедите Мои, за да не навлечат поради нив грев врз себе и да не умрат поради нив, ако се осквернат. Јас сум Господ Бог, Кој ги осветува.

¹⁰Никој од друг род да не јаде од светите приноси: кој се населил кај свештеник, ни наемникот негов, не смее да јаде од светите приноси.

¹¹Ако свештеникот си купи човек со пари, тој нека јаде од лебовите негови; исто така и домашните негови можат да јадат од неговите лебови.

¹²Ако свештеничка ќерка се омажи за човек од друго племе, таа не смее да јаде од првините на светото,

¹³а ако таа остане вдовица или биде разведена, а нема деца, и се врати во татковата куќа, како што била на млади години, тогаш таа може да јаде од лебовите на татка си; но никој друг род не смее да јаде од нив.

¹⁴Кој поради незнаење јаде нешто од осветените приноси, тој дел треба да му го врати толку на свештеникот и да додаде кон него уште една петина од тоа.

¹⁵И да не ги осквернуваат светињите на синовите Израилеви, принесувани на Господа;

¹⁶и да не навлекуваат врз себе беззаконие поради престап, со тоа што ќе јадат од нивните дарови, зашто Јас сум Господ, Кој ги осветува.«

¹⁷И му рече Господ на Мојсеја, велејќи:

¹⁸»Кажи им на Арона и на синовите негови и на сите синови Израилеви кажи им: ако некој од синовите Израилеви, или од придојдените меѓу народот Израилев, било поради исповедание или од благодарност принесува жртви какви што Му се принесуваат на Господа, за сепаленица,

¹⁹за да му се прими жртвата милостиво, треба да биде од машки пол од стадата волови или овци, или кози, без недостаток;

²⁰а си што има недостаток, да не Му се принесува на Господа, бидејќи тоа ќе Му биде непријатно.

²¹И ако некој Му принесува на Господа жртва за спасение, исполнувајќи завет или по своја волја, или на вашите празници, тогаш тоа треба да биде од стадата на говедата или овците и да биде без недостаток, за да му биде примена — и да нема никаков недостаток.

²²Животно слепо или сакато, или со пресечен јазик, или шугаво, или краставо, или со лишај — такви не принесувајте Му на Господа и од нив не давајте на Господа жртва на жртвеникот.

²³Теле или овца со долги уши или кратки нозе можеш да принесеш како жртва по своја волја: но ако е за завет, нема да се прими.

²⁴Животно со дробови слаби и болни, резано или тргано, не принесувај Му на Господа; во земјата ваша не правете го тоа.

²⁵И од рацете на туѓинец на принесувате Му на Господа никакви дарови на вашиот Бог, затоа што тие се повреда, имаа недостаток: тие нема да ви се примат.«

²⁶И му рече Господ на Мојсеја, велејќи:

²⁷»Кога ќе се роди теле, или јагне, или козле, да остане кај мајка си седум дена, а од осмиот ден и натаму ќе може да се принесува како дар на Господа, —

²⁸но не колете ни теле, ниту јагне во ист ден заедно со мајката негова.

²⁹Ако Му принесувате на Господа жртва по завет, со радост принесувајте ја.

³⁰Таа да се изеде истиот ден, не оставајте од месото за другиот ден. Јас сум Господ.

³¹Пазете ги заповедите Мои и извршувајте ги. Јас сум Господ.

³²Не осквернувајте го Моето свето име, за да бидам свет меѓу синовите Израилеви. Јас сум Господ, Кој ве осветува,

³³Кој ве изведов од Египетската земја, за да бидам ваш Бог. Јас сум Господ.«