Read Свето Писмо (Гаврилова) 1990 Левит 27 Bible Online

Левит 27 - Свето Писмо (Гаврилова) 1990 bible

Левит 27

¹И му рече Господ на Мојсеја, велејќи:

²»Кажи им на синовите Израилеви и речи им — ако некој се заветува да ја посвети душата своја на Господа со цена,

³цената за маж од дваесет до шеесет години да биде шеесет сребрени дидрахми, според свештената мерка.

⁴Ако е, пак, за жена, цената да биде триесет дидрахми.

⁵За машко од пет до дваесет години цената ќе биде дваесет дидрахми, а за женски десет дидрахми.

⁶За машко, пак, од еден месец до пет години цената треба да изнесува пет сребрени дидрахми, а за женско три сребрени дидрахми.

⁷За маж од шеесет години и нагоре цената ќе биде петнаесет среберни дидрахми, додека за жена десет дидрахми.

⁸Ако е сиромав и нема да плати според цената своја, тогаш тој нека се претстави пред свештеникот, и свештеникот нека го процени: според состојбата на оној, што се заветувал, така нека го процени свештеникот.

⁹Ако е, пак, добиче од оние што Му се принесуваат како жртва на Господа, ако Му се даде од овие на Господа, ќе биде свето;

¹⁰да не се заменува доброто со лошо, или лошото со добро; ако некој замени добиче со добиче тогаш и добичето и неговата замена ќе бидат светиња.

¹¹Ако е тоа нечист добиток, што не се принесува како жртва на Господа, тој нека му биде претставен на свештеникот,

¹²и свештеникот да процени, дали е тој добар, или лош; како ќе го оцени свештеникот, така и нека биде;

¹³ако некој сака да го откупи, нека додаде кон цената уште една петина.

¹⁴Ако некој Му ја посветува на Господа куќата своја за светиња, свештеникот да ја процени, дали е таа добра, или лоша; како што ќе ја оцени свештеникот, така и да биде.

¹⁵Ако оној што ја посветил, побара да ја откупи куќата своја, нека приложи уште една петина во сребро кон цената нејзина, и тогаш таа нека биде негова.

¹⁶Ако некој Му посвети на Господа од имотот свој нива, процената треба да биде сразмерно со посеаното: за еден гомер јачмен — педесет сребрени дидрахми.

¹⁷Ако некој ја посветува нивата своја во прошталната година, тоа треба да биде според нејзината проценка.

¹⁸Ако некој ја посветува нивата своја по прошталната година, треба да биде според неа и процената. Ако ја посветува најдоцна до прошталната година, свештеникот нека ја определи цената во сребро според годините што остануваат до идната проштална година, и да одземе и за толку да ја намали цената.

¹⁹Ако оној, што ја посветил нивата своја, побара да ја откупи, нека додаде уште една петина во сребро кон цената нејзина, и таа нека биде негова.

²⁰Ако, пак, тој не ја откупи нивата своја и нивата биде продадена на друг човек, тој веќе не може да ја откупи;

²¹таа нива, откако ќе биде ослободена во прошталната година, нека биде светиња Господова; таа нека биде земја одделена од сопственост и да биде за свештеникот.

²²Ако некој Му посвети на Господа купена нива, која не е во селото на имотот негов,

²³свештеникот нека ја определи цената нејзина до прошталната година, и тоа да ја даде, според она како што е пресметано, во истиот ден, како светиња Господова;

²⁴а нивата во прошталната година пак нека мине на оној, од кого била купена и кој што владеел со таа земја.

²⁵Секоја проценка да се врши според свештената мерка — дваесет пенези да чинат една дидрахма.

²⁶А секое првородено што ќе се роди меѓу добитокот твој, никој не може да го заветува: било вол, било од овците — тие се Господови.

²⁷Ако, пак, добитокот е нечист, да се откупува според цената негова и да се додаде кон неа уште една петина; ако не се откупи, тогаш нека се продаде според неговата процена.

²⁸А си што човек Му ветува на Господа со клетва од она, што ги има — од човек до добиток или нива од имотот свој, да не се продава ниту да се откупува: секој завет со клетва е најсвета светиња Господова.

²⁹И си што е ветено од луѓето со клетва, не се откупува: тоа треба да се предаде на смрт.

³⁰И секоја десетина од земјата, од земните семиња и од плодовите на дрвјата Му припаѓаат на Господа: тоа се светиња Господова;

³¹ако некој ја откупи десетината своја, да додаде кон цената нејзина уште една петина.

³²И секој десеток од воловите, од овците и од си десето што ќе падне под жезал, треба да Му падне на Господа;

³³и да не се заменува добро за лошо, ниту лошо за добро; ако некој го замени, тогаш тоа самото и неговата замена да бидат светиња — да не се откупува.«

³⁴Тоа се заповедите, кои Господ им ги даде на синовите Израилеви преку Мојсеј на планината Синај.