Read Свето Писмо (Гаврилова) 1990 Јеремија 13 Bible Online

Јеремија 13 - Свето Писмо (Гаврилова) 1990 bible

Јеремија 13

¹Вака ми рече Господ: оди и купи си ленен појас и опаши се со него, но не клавај го во вода.

²Јас си купив појас, како што рече Господ, и го препашав крстот свој.

³И би слово Господово до мене по вторпат, и ми беше речено —

⁴земи го појасот, што го купи, и кој ти е на крстот твој, па стани и оди до Ефрат и сокри го таму во некоја камена пукнатина.

⁵Јас отидов и го сокрив при Ефрат, како што ми заповеда Господ.

⁶А штом изминаа повеќе дни, Господ ми рече — стани, оди при Ефрат и земи го оттаму појасот, за кој ти бев заповедал да го сокриеш таму.

⁷И јас отидов до Ефрат, ископав и го зедов појасот од местото, каде што го бев сокрил, а тоа — појасот беше изгнил и станал веќе неупотреблив.

⁸И би слово Господово до мене:

⁹вака вели Господ ќе ја скршам гордоста на Јуда, и големата гордост на Ерусалим.

¹⁰Тој лош народ, кој не сака да ги слуша зборовите Мои, живее според тврдокорното срце свое и оди по други богови, за да им служи и да им се клања, па ќе биде како овој појас, кој не е годен за ништо.

¹¹Оти, како што појасот се прилепува до крстот на човекот, така и Јас го прилепив до Себе сиот Израилев дом и сиот Јудин дом, вели Господ, за да бидат Мој народ и Моја слава, похвала и украс, но тие не послушаа.

¹²Затоа, кажи им го овој збор: вака вели Господ, Бог Израилев — секој мев за вино се полни со вино. Тие ќе ти речат: зар ние не знаеме, дека секој мев за вино се полни со вино?

¹³А ти кажи им: еве што вели Господ — Јас ќе ги наситам со вино до опивање сите жители на таа земја, и царевите, кои седат на Давидовиот престол, свештениците и пророците и сите ерусалимски жители,

¹⁴и ќе ги судрам еден со друг, татковците со синовите заедно, вели Господ; нема да ги поштедам, нема да ги помилувам, нема да зажалам што ќе ги истребам.

¹⁵Слушајте и внимавајте; немојте да бидете горди, оти Господ зборува.

¹⁶Подајте слава на Господа, вашиот Бог, додека Он сѐ уште не испратил темнина и додека сѐ уште нозете ваши не се спотакнуваат по темни гори; тогаш ќе очекувате светлина, а Он ќе ја претвори во смртна сенка и ќе ја направи темнина.

¹⁷Ако, пак, не го послушате тоа, душата моја ќе ја оплакува вашата гордост во скришни места, ќе плаче горко, и очите мои слози ќе леат; бидејќи стадото Господово ќе биде во плен одведено.

¹⁸Кажи му на царот и на царицата: смирете се, седнете пониско, оти ќе паднат од главите ваши венците на вашата слава.

¹⁹Јужните градови се затворени, и нема кој да ги отвори; цела Јуда во ропство се одведува заедно со сиот плен.

²⁰Кренете ги очите и погледајте ги оние што идат од север: каде е стадото, што ти беше дадено, убавото стадо твое?

²¹Што ќе речеш, ќерко Сионова, кога ќе те посети Он? Ти сама ги научи да господарат над тебе: нема ли да те стегнат болки како жена кога раѓа?

²²Ако речеш во срцето свое: »зошто ме снајде ова?« — па, поради многуте твои беззаконија, ќе се кренат твоите поли и твоите пети се соголија.

²³Може ли Етиопјанин да ја смени кожата своја и леопардот — дамките свои? Па така и вие, можете ли да правите добро, кога сте свикнати да вршите зло?

²⁴Затоа ќе ги развеам како прав, ќе ги разнесам со пустински ветар.

²⁵Ете го твојот жреб, делот што сум ти го одмерил, вели Господ, бидејќи ти Ме заборави и се надеваше на лага.

²⁶Затоа, ќе ти биде крената полата твоја врз лицето твое, за да се види срамотијата твоја.

²⁷Го видов твоето прељубодејство и твоите бесни похоти и гнасотии по височинките и по полињата; тешко тебе, Ерусалиме; зар нема да се очистиш? А до кога уште?