Read Свето Писмо (Гаврилова) 1990 Јеремија 18 Bible Online

Јеремија 18 - Свето Писмо (Гаврилова) 1990 bible

Јеремија 18

¹Слово Господово што дојде до Јеремија:

²стани и слези во домот на грнчарот, и таму ќе ти ги кажам зборовите Мои.

³Слегов во домот на грнчарот, а тој ја вршеше својата работа на тркалото.

⁴Садот, пак, што го правеше грнчарот од глина, се растури во рацете негови. Но тој одново направи од него друг сад, како што му падна на ум да направи.

⁵И би слово Господово до мене:

⁶доме Израилев, не можам ли да постапам со вас како овој грнчар, рече Господ. Ете, како што е глината во рацете на грнчарот, тоа сте и вие во рацете Мои, доме Израилев.

⁷Понекогаш, велам Јас за некој народ и царство, дека ќе го искоренам, ќе го згазам и погубам;

⁸но, ако тој народ, врз кого сум го изрекол тоа се поврати од лошите свои дела, Јас го одлагам злото, што сум намислил да го направам.

⁹А понекогаш велам за некој народ и некое царство дека ќе ги подигнам и ќе ги зацврстам;

¹⁰но, ако тој народ врши зло пред очите Мои и не го слуша гласот Мој, ќе го одменам доброто, со кое сум намислил да го дарувам.

¹¹Па така, кажи им на луѓето Јудини и на жителите ерусалимски: вака вели Господ — еве, Јас ви подготвувам зло и смислувам нешто против вас; затоа повратете се секој од својот лош пат и исправете ги патиштата свои и постапките свои.

¹²Но тие велат: »Не надевај се; ние ќе си живееме како што сакаме и секој од нас ќе постапува според упорството на своето лошо срце.«

¹³Затоа вака вели Господ: распрашајте се меѓу народите, дали чул некој нешто слично? Многу гнасни дела изврши Израилевата девојка.

¹⁴Ги напушта ли ливанскиот снег планинските карпи, и секнуваат ли по други места течните студени води?

¹⁵А Мојот народ Ме остави; кади на суети, се спотакнува на своите патишта, ги остава старите патишта, за да оди по патеки, по непрооден пат,

¹⁶за да ја направи земјата своја ужас, вечен срам, така што секој што ќе минува преку неа да се чуди и да мавта со главата.

¹⁷Како источен ветар ќе ги распрснам пред непријателот; со грбот, а не со лицето свое ќе се свртам кон нив во денот на нивната неволја.

¹⁸А тие рекоа: »Дојдете да направиме заговор против Јеремија; оти нема да исчезне законот на свештеникот и советот на мудриот и зборот на пророкот, дојдете да го убиеме и да не обрнуваме внимание на неговите зборови.«

¹⁹Послушај ме, Господи, и чуј го гласот на моите противници.

²⁰Треба ли да се враќа зло за добро, а тие ми копаат јама за душата моја. Сети се дека стојам пред лицето Твое, за да зборувам добро за нив, за да го одвратам од нив гневот Твој.

²¹И така, предај ги синовите нивни на глад и направи да загинат од меч; жените нивни да немаат деца и да станат вдовици, мажите нивни да умираат, а младичите нивни да бидат убивани во бој.

²²Нека се слуша пискот од куќите нивни, кога ненадејно ќе испратиш војска; зашто тие копаат јама, за да ме фатат, и тајно поставија замка за нозете мое.

²³Но Ти, Господи, им ги знаеш сите нивни сплетки против Мене, за да ме убијат; не проштевај ги неправдите нивни, и не бриши го гревот нивни, пред лицето Свое; нека попаѓаат пред Тебе; дејствувај против нив, кога си гневен.