Read Свето Писмо (Гаврилова) 1990 Јеремија 21 Bible Online

Јеремија 21 - Свето Писмо (Гаврилова) 1990 bible

Јеремија 21

¹Слово, кое дојде од Господа до Јеремија, кога царот Седекија го испрати до него Пасхора, синот Молхиев, и свештеникот Софонија, син Маасиев, за да му кажат:

²»Прашај Го Господа за нас, зашто вавилонскиот цар Навуходоносор војува против нас; можеби Господ ќе направи со нас некое од своите чудеса, за да си отиде тој од нас!«

³И им рече Јеремиј: ова кажете му го на Седекија —

⁴вака вели Господ, Бог Израилев — еве, Јас ќе ги свртам назад воените оружја, кои се во вашите раце, со кои се биете со вавилонскиот цар и против Халдејците, што ве опседнуваат наоколу, надвор од ѕидовите и ќе ги поразам во средината на градот;

⁵и Сам ќе војувам против вас со протегната рака и со силна мишка, со гнев и со јарост и со големо негодување;

⁶И ќе поразам сѐ, што живее во тој град — и луѓето и добитокот; од голем помор ќе изумрат тие.

⁷А потоа, вели Господ, јудејскиот цар Седекија, слугите негови, народот и сите избавени од помор во тој град, од меч и од глад ќе ги предадам во рацете на Навуходоносора, царот вавилонски, во рацете на нивните непријатели и во рацете на оние, што ја бараат душата нивна, и тој ќе ги сотре со остар меч и нема да ги поштеди, нема да ги пожали и нема да се смилостиви над нив.

⁸Па кажи му на тој народ — вака вели Господ: еве, Јас ви предлагам пат кон живот и пат кон смрт,

⁹оној, што ќе остане во овој град, ќе умре од меч, од глад и од помор, а кој ќе излезе и им се предаде на Халдејците, што го опсадуваат, ќе биде жив, но душата негова ќе биде заробена место него;

¹⁰зашто Јас го свртив лицето Свое против тој град, вели Господ, за зло, а не за добро; тој ќе биде предаден во рацете на вавилонскиот цар, и тој ќе го изгори со оган.

¹¹Зборувај и кон домот на јудејскиот цар: чујте го словото Господово —

¹²доме Давидов, така вели Господ: судете рано изутрина и избавете го угнетуваниот од рацете на угнетувачот, за да не избувне оган од јароста Моја и да се разгори поради вашите лоши дела, што никој не ќе може да го угасне.

¹³Еве, Јас сум против тебе, ти што седиш, како на карпа во долината, вели Господ, против вас сум, вие кои велите: »кој ќе излезе против нас и кој може да влезе во нашите живеалишта?«

¹⁴Но, Јас ќе ве казнам според плодовите на делата ваши, вели Господ, и ќе запалам оган во вашата гора; кој ќе проголта сѐ што постои околу неа.