Read Свето Писмо (Гаврилова) 1990 Јеремија 23 Bible Online

Јеремија 23 - Свето Писмо (Гаврилова) 1990 bible

Јеремија 23

¹Тешко им на пастирите, што ги погубуваат и растураат овците на Моето стадо, вели Господ.

²Затоа вака вели Господ, Бог Израилев, кон пастирите, кои го пасат народот Мој: вие ги растуривте овците Мои, ги упропастивте и не се грижите за нив; еве, Јас ќе ве казнам за вашите лоши дела, вели Господ.

³И ќе го соберам остатокот од Моето стадо, од сите земји каде што ги бев изгонил, и ќе ги вратам во трлата нивни, па ќе се плодат и ќе се размножуваат.

⁴И ќе поставам над нив пастири, што ќе ги пасат, и тие нема веќе да се бојат, ниту ќе се плашат и нема да се губат, вели Господ.

⁵Еве, настапуваат дни, вели Господ, и ќе му издигнам на Давида фиданка, и ќе се зацари Цар, Кој ќе постапува мудро и ќе суди праведно на земјата.

⁶Во дните Негови Јуда ќе се спаси, и Израилот ќе живее безопасно; и еве, — Неговото име со кое ќе го именуваат е »Господ — наше оправдание!«

⁷Затоа, еве, идат дните, вели Господ, кога веќе нема да се зборува: »жив Господ, Кој ги изведе синовите Израилеви од земјата Египетска«,

⁸туку »да е жив Господ, Кој го изведе и Кој го доведе племето на домот Израилев од северната земја и од сите земји, каде што ги беше изгонил«, и тие ќе живеат во земјата своја.

⁹Поради пророците срцето ми се кине во мене, сите коски ми се тресат, јас сум како пијан, како човек што го фатило виното, заради Господа и заради Неговите свети зборови,

¹⁰зашто земјата се наполни со прељубници, и земјата плаче поради проклеството; се исушиле пасиштата по пустињите, зашто стремежот им е зло, а силата нивна — неправда;

¹¹бидејќи и пророкот и свештеникот се лицемерни: дури и во домот Мој го забележав бесчестието нивно, вели Господ.

¹²Затоа патот нивни ќе биде лизгаво место во темнината — ќе ги туркаат и тие ќе паѓаат таму; оти Јас ќе испратам врз нив беда во годината, кога ќе ги посетам, вели Господ.

¹³А кај пророците во Самарија видов безумие, тие пророкуваат во името на Ваала и го воведуваат во заблуда народот Мој, Израилот.

¹⁴А кај пророците во Ерусалим гледам нешто страшно: тие прељубодејствуваат и одат во лага, ги поткрепуваат рацете на злодејците, та никој од нив да не се откаже од бесчестието свое; сите тие се пред Мене како Содом, а жителите негови — како Гомор.

¹⁵Затоа вака вели Господ Саваот за пророците: еве, ќе ги нахранам со пелин и ќе ги напојам со жолчна вода, заради тоа што од ерусалимските пророци се разнесе осквернување по целата земја.

¹⁶Така вели Господ Саваот: немојте да ги слушате зборовите на пророците, кои ви пророкуваат — тие ве лажат, кажуваат измислени работи од срцето свое, е не она што доаѓа од устата Господова.

¹⁷Тие постојано им зборуваат на оние, кои не Ме почитуваат: »Господ рече, мир ќе имате.« И на секого кој се управува според тврдокорноста на срцето свое, велат: »зло нема да ве снајде.«

¹⁸Зашто, кој е тој што стоел во советот на Господа, па видел и го чул словото Негово? Кој внимавал на Неговото слово и кој го чул тоа?

¹⁹Еве, иде бурата Господова со јарост, бура страшна, и ќе се свие врз главата на безбожниците.

²⁰Гневот Господов нема да се одврати сѐ додека Он не ги изврши и додека не ги исполни замислите на Своето срце; во последните дни тоа наполно ќе го разберете.

²¹Јас не ги праќам тие пророци, а самите се беа растрчале; Јас не им зборував, а тие пророкуваа.

²²Да беа стоеле во советот Мој, тие ќе ги објавеа на Мојот народ зборовите Мои и ќе ги отклонеа од нивниот лош пат и од нивните лоши дела.

²³Зар Јас сум Бог, кој само одблизу зборувам, вели Господ, а не Бог и од далеку?

²⁴Може ли човек да се сокрие на место тајно, каде што Јас не би го видел? — вели Господ. Зар не го исполнувам Јас небото и земјата — вели Господ.

²⁵Јас слушав што зборуваат пророците, кои во името Мое пророкуваат лага. Тие велат: »ми се сони, ми се сони.«

²⁶Долго ли ќе трае тоа во срцето на пророците, кои пророкуваат лага, кои пророкуваат измама од срцата свои?

²⁷Мислат ли тие дека преку своите соништа, што си ги раскажуваат еден на друг, да го доведат Мојот народ дотаму што да го заборави името Мое, како што го заборавија татковците нивни името Мое заради Ваала?

²⁸Пророкот што видел сон, нека го раскаже како сон, а во кого е словото Мое, нека го каже верно словото Мое. Што заедничко има плевата со пченицата, вели Господ.

²⁹Зар не е Моето слово како оган, вели Господ, и не е ли како чекан што крши карпа?

³⁰Затоа, еве, Јас сум против пророците, вели Господ, кои ги крадат зборовите Мои еден од друг.

³¹Еве, Јас сум против пророците, вели Господ, кои го креваат својот јазик и велат: »Он рече.«

³²Еве, Јас сум против пророците на лажни соништа, вели Господ кои ги кажуваат и преку своите измами и итрини го заблудуваат, Мојот народ, кога Јас не сум ги пратил, ниту сум им заповедал; затоа тие не донесуваат никаква полза за тој народ, вели Господ.

³³Ако те праша тој народ, или пророк, или свештеник: какво е бремето од Господа? а ти кажи му — »вие сте бреме. Јас ќе ве напуштам,« вели Господ.

³⁴Ако пророкот, или свештеникот, или народот каже: »тоа е бреме од Господа«, Јас ќе го казнам тој човек и домот негов.

³⁵Туку вака велите еден на друг и брат брату: »што одговори Господ?« или — »што вели Господ?«

³⁶А тој збор: »бреме од Господа«, не употребувајте го во иднина, зашто на таков човек бреме ќе му биде неговиот збор, бидејќи вие ги изопачувате зборовите на живиот Бог, Господа Саваота, нашиот Бог.

³⁷Вака вели му на пророк: »што ти одговори Господ?« или — »што рече Господ?«

³⁸Ако пак сѐ уште велите: »бреме од Господа«, тоа така вели Господ, поради тој збор што го кажувате — »бреме од Господа«, кога пак, Јас ве пратив да велите: не говорете — »бреме од Господа«,

³⁹еве затоа ќе ве заборавам наполно, ќе ве оставам и ќе го отфрлам од лицето Свое овој град, кој ви го дадов вам и на татковците ваши.

⁴⁰И врз вас ќе испратам вечна поруга и вечен срам, кој нема да се заборави.