Read Свето Писмо (Гаврилова) 1990 Јеремија 33 Bible Online

Јеремија 33 - Свето Писмо (Гаврилова) 1990 bible

Јеремија 33

¹И вторпат би слово Господово до Јеремија, кога беше тој затворен во стражарницата —

²вака вели Господ, Кој ја создаде земјата, Господ, Кој ја уреди и зацврсти, — Кому Му е името Господ:

³повикај кон Мене, и Јас Ќе ти одговорам, ќе ти покажам нешто големо и недостапно, нешто, што ти не го знаеш.

⁴Оти, така вели Господ, Бог Израилев, за куќите на овој град и за куќите на јудејските цареви, што ќе се урнат за окопи и за борби.

⁵Оние, што дојдоа да се борат против Халдејците, за да ги исполнат домовите со трупови на луѓе, кои Јас во Својот гнев и во јароста Своја ќе ги поразам и поради чие беззаконие Јас го сокрив лицето од тој град.

⁶Еве, Јас ќе ги излекувам, ќе ги исцелам и ќе им откријам изобилие на мир и вистина,

⁷ќе ги вратам заробените на Јуда и заробените на Израилот и ќе ги зацврстам како порано,

⁸ќе ги исчистам од секое нивно беззаконие, со кое згрешија пред Мене, и ќе им ги простам сите нивни гревови, со кои се огрешија пред Мене и остастапија од Мене.

⁹И Ерусалим ќе биде за Мене радосно име, похвала и чест, пред сите земни народи, што ќе чујат за сите добра, какви што ќе им давам и ќе се уплашат и ќе затреперат од сите добра и од секаков благослов, што ќе им го дадам.

¹⁰Така вели Господ: на ова место за кое вие велите — »тоа е пусто, без луѓе и без добиток«, во јудејските градови и во ерусалимските улици, кои се пусти, без луѓе, без жители, без добиток,

¹¹пак ќе се слуша глас од радост и глас од веселба, глас на младоженец и глас на невеста, глас на оние што велат: »славете Го Господа Саваота, зашто е благ Господ, зашто е милоста Негова вечна«, и глас на оние што принесуваат благодарствена жртва во домот Господен; бидејќи Јас ќе ги вратам заробените од оваа земја во нивната поранешна состојба, вели Господ.

¹²Така вели Господ Саваот: во ова место, кое е пусто — без луѓе, без добиток, и во сите негови градови пак ќе има живеалишта на пастири, што ќе ги доведуваат стадата свои на одмор.

¹³Во планинските градови, во градовите по полето и во јужните градови, во земјата на Венијамина, во ерусалимските предградија и во градовите Јудини пак ќе врват стада под раката на оној што ќе ги пребројува, вели Господ.

¹⁴Еве настапуваат дни, вели Господ, кога ќе го исполнам ова добро слово, што го изреков за домот Израилев и за домот на Јуда.

¹⁵Во тие дни и во тоа време ќе благословам на Давида да му израсте Подмладок на правдата, и Он ќе изврши суд и правда на земјата.

¹⁶Во тие дни Јуда ќе биде спасен, и Ерусалим ќе живее безопасно и ќе Му стават име: »Господ е наша правда!«

¹⁷Оти, така вели Господ: нема да снема маж при Давида, што не ќе седи на престолот во домот Израилев,

¹⁸и кај левитските принесувачи на жртви нема да снема пред лицето Мое човек, кој преку сите дни да не вознесува сепаленица, да изгорува приноси и да принесува жртви.

¹⁹И би слово Господово до Јеремија —

²⁰вака вели Господ: ако можете да го разрушите заветот Мој со денот и заветот Мој со ноќта, така што денот и ноќта да не се сменуваат во определеното време,

²¹тоа тогаш ќе можете да го разрушите и заветот Мој со Мојот слуга Давида, така што да нема при него син, што ќе царува на неговиот престол, а исто така и со левитите — свештеници, служители Мои.

²²Како што е небесната војска безбројна, и песокта морска неизброива, така ќе се размножи племето на Мојот слуга Давида и на левитите кои Ми служат.

²³И би слово Господово до Јеремија:

²⁴зар не гледаш, дека овој народ вели — »двете племиња, кои Господ ги избра, Он ги отфрли«, и со тоа тие го презираат Мојот народ како веќе да не е народ Мој пред очите нивни?

²⁵Така вели Господ: да не бев го утврдил заветот Мој со денот и ноќта и наредбите на небото и на земјата,

²⁶тоа тогаш и племето на Јакова и на Мојот слуга Давида, ќе го отфрлев, за да не земаат веќе од неговото племе владетели, за племето на Авраама, и Исака, и Јакова, бидејќи ќе ги вратам нивните заробени и ќе ги помилувам.