Read Свето Писмо (Гаврилова) 1990 Јеремија 35 Bible Online

Јеремија 35 - Свето Писмо (Гаврилова) 1990 bible

Јеремија 35

¹Слово од Господа, упатено до Јеремија во дните на јудејскиот цар Јоаким, син Јосиев:

²оди во домот на Рехавовци, позборувај со нив и доведи ги во домот Господов, во една од собите и дај им да пијат вино.

³Јас го поведов Јазанија, синот на Јеремија, син Авациниев, и братот негов, сите синови негови и сиот дом на Рехавовци,

⁴па ги доведов во домот Господен, во собата на синовите од Годолија, син Ананов, човек Божји, која се наоѓа до собата на кнезовите, а над собата на Масеа, син Селумов, стражар при влезот.

⁵И поставив пред синовите од домот на Рехавовци полни грнци со вино и чаши, па им реков: »Пијте вино!«

⁶Но тие рекоа: »Ние вино не пиеме, бидејќи нашиот татко Јонадав, син Рехавов, ни заповедал, велејќи — ‚вино не пијте ни вие, ниту децата ваши довека;

⁷и куќи не правете, и семиња немојте да сеете, лоза не садете; такви работи да нема при вас, туку преку сите денови на животот свој живејте во шатори, за да поживеете долго на оваа земја, каде што сте туѓинци.‘

⁸И ние го послушавме гласот на нашиот татко Јонадав, син Рехавов, во сѐ, што ни заповеда — да не пиеме вино во текот на сите наши дни, ние и жените наши, синовите наши и ќерките наши,

⁹и да не правиме куќи за наше живеење; и, ете, ние немаме ни лозја, ни ниви, ниту градини,

¹⁰туку живееме во шатори и во сѐ се покоруваме и го вршиме сето она, што ни заповеда нашиот татко Јонадав.

¹¹А кога вавилонскиот цар Навуходоносор дојде во оваа земја, ние си рековме: да си одиме, да појдеме во Ерусалим пред халдејската војска и пред арамејската војска, и, еве, ние живееме во Ерусалим.«

¹²И би слово Господово до Јеремија:

¹³вака вели Господ Саваот, Бог Израилев: оди, кажи им на луѓето Јудини и на жителите ерусалимски — зар нема да излечете поука од ова за себе, па да ги послушате зборовите Мои, вели Господ.

¹⁴Се исполнуваат зборовите на Јонадава, синот Рехавов, кој им заповеда на синовите свои да не пијат вино, и тие до ден денес не пијат, бидејќи му се покоруваат на заветот што му го дале на својот татко; Јас, пак, постојано ви зборував од рано утро, а вие не Ме послушавте.

¹⁵Ги испраќав Јас при вас сите Мои слуги — пророците ги праќав од рано утро, и велев — повратете се секој од својот лош пат и исправете го поведението свое и не одете по други богови, за да им служите, па ќе живеете во оваа земја, кој ви ја дадов вам и на татковците ваши; но вие не го приклонивте увото и не Ме послушавте.

¹⁶Бидејќи синовите на Јонадава, синот Рехавов, ја исполнуваат заповедта на својот татко, што беше им ја дал, а овој народ Мој Мене не Ме слуша,

¹⁷затоа, вака вели Господ, Бог Саваот, Бог Израилев — еве, Јас ќе го испратам врз Јудеја и врз сите жители ерусалимски сето ова зло, што го изреков врз нив, зашто Јас им зборував, а тие не слушаа, им викав, а тие не одговараа.

¹⁸А на домот на Рехавовци, Јеремиј им рече — вака вели Господ Саваот, Бог Израилев: бидејќи го послушавте заветот на вашиот татко Јонадава и ги пазите сите негови заповеди и во сѐ постапувате, како што ви заповедал,

¹⁹затоа, вака вели Господ Саваот, Бог Израилев — никогаш нема да недостига од Јонадава, синот Рехавов, човек што ќе стои пред лицето Мое во сите дни.