Read Свето Писмо (Гаврилова) 1990 Плач Јеремиин 3 Bible Online

Плач Јеремиин 3 - Свето Писмо (Гаврилова) 1990 bible

Плач Јеремиин 3

¹Јас сум човек, кој видов мака од жезалот на Неговиот гнев;

²Он ме поведе и воведе во темнина, а не во светлина.

³Оне се обрна само против мене и цел ден ме биеше со раката Своја;

⁴го сплеска телото мое и кожата моја, ги здроби коските мои;

⁵ме загради и ме опколи со горчила и маки;

⁶ме постави во темно место, како одамна умрените;

⁷ме огради со ѕид, за да не изгегувам, ми направи тешки вериги;

⁸и, кога викав и пискав, ја задржуваше молитвата моја;

⁹со камења ги прегради патиштата мои, ги искриви патеките мои.

¹⁰Он стана за мене како мечка во заседа, како лав на скришно место;

¹¹ги искриви патиштата мои и ме раскина, ме уништи;

¹²го затегна лакот Свој и ме постави како цел за стрела;

¹³ги прострела бубрезите мои со стрели од торбата Своја.

¹⁴Станав потсмев за сиот народ мој, негова секојдневна песна.

¹⁵Ме презасити со горчила, со пелин ме напои;

¹⁶со камен ми ги скрши забите мои, со пепел ме покри.

¹⁷Избега мирот од душата моја; заборавив за добри работи

¹⁸и реков: ја снема силата моја и надежта моја од Господа.

¹⁹Помисли на моето страдање и на мојата мака, за пелинот и за жолчката.

²⁰Душата моја силно се сеќава на тоа и отпаѓа во мене.

²¹Еве што му одговорив на срцето мое и поради тоа имам надеж:

²²по милоста на Господа не загинавме наполно, бидејќи милосрдието Негово не е пресекнато;

²³тоа се обновува секое утро; верноста Негова е голема!

²⁴Гсопод е дел мој, ми вели душата, па така на Него ќе се надевам.

²⁵Добар е Господ кон оние, кои се надеваат на Него, кон душата, која Го бара.

²⁶Добро му е на оној, кој треперливо го очекува спасението од Господа.

²⁷Добро е за човекот да го носи јаремот свој во младоста своја.

²⁸Сам ќе седи и ќе молчи, бидејќи Господ му го ставил бремето на него.

²⁹Нека ја допре устата своја до земјата, можеби уште има надеж.

³⁰Го подава образот свој на оној, кој бие, да трпи навреди до презастување,

³¹бидејќи Господ не отфрла за навек.

³²Пратил ли неволја, Он и ќе се смилува според Својата голема милост.

³³Зашто Он не по волјата на Своето срце ги казнува и ги огорчува синовите човечки.

³⁴Но, кога ги газат со нозете сите затвореници на земјата,

³⁵кога неправедно го осудуваат човека пред лицето на Севишниот,

³⁶кога го притеснуваат човека во неговата работа: зар Господ не гледа?

³⁷Кој вели — »бива и она што Господ не заповедал да биде?«

³⁸Зар не доаѓаат и злото и доброто од устата на Господа?

³⁹На што се жалат живите луѓе? Секој за гревовите свои?

⁴⁰Да ги испитаме и да ги истражиме патиштата свои и да се обрнеме кон Господа.

⁴¹Нека го подигнеме срцето свое и рацете свои кон Бога, Кој е на небесата.

⁴²Ние згрешивме и се противевме, Ти не нѐ поштеди.

⁴³Ти се облече со гнев и нѐ прогони, нѐ умртвуваше, и не нѐ жалеше;

⁴⁴Ти се сокри во облак, за да не достигне молитвата наша;

⁴⁵смет и гнасотија нѐ направи меѓу народите.

⁴⁶Ги отворија против нас устите широко сите наши непријатели.

⁴⁷Ужас и јама, пустош и разорение — тоа е делот наш.

⁴⁸Потоци солзи лее окото мое за погибелта на ќерката од мојот народ.

⁴⁹Окото ми се прелива и не престанува, бидејќи нема одмор

⁵⁰сѐ додека Господ не погледне милостиво и види од небесата.

⁵¹Окото мое е причина да страда душата моја заради сите ќерки на мојот град.

⁵²Постојано се силат непријателите мои да ме уловат како птичка, без никаква причина.

⁵³Го фрлија во јама животот мој и ме засипаа со камења.

⁵⁴Водата се подигна над главата моја; па си реков — »загинав.«

⁵⁵Го призвав името Твое, Господи, од јамата длабока.

⁵⁶Ти го чу гласот мој; не прикривај го увото Свое од мојата воздишка и од мојот плач!

⁵⁷Ти се приближуваше, кога ќе повикав кон Тебе, и велеше — не бој се!

⁵⁸Ти го заштитуваше, Господи, делото на мојата душа; го откупуваше мојот живот.

⁵⁹Ти го гледаш, Господи, моето притеснување; пресуди го делото мое.

⁶⁰Ти ја гледаш сета одмазда нивна, сите намери нивни против мене.

⁶¹Ти ги слушаш, Господи, навредите нивни, сите намери нивни против мене,

⁶²зборовите на оние, што стануваат против мене, и лукавствата нивни против мене секој ден.

⁶³Погледај, седнат ли, станат ли, јас сум песна за нив.

⁶⁴Отплати им, Господи, според делата на рацете нивни;

⁶⁵прати им помрачение на срцето нивно и проклетсвото Твое врз нив;

⁶⁶гони ги, Господи, со гнев и истреби ги од поднебјето!