Read Свето Писмо (Гаврилова) 1990 Варух 1 Bible Online

Варух 1 - Свето Писмо (Гаврилова) 1990 bible

Варух 1

¹Ова се зборови од книгата, што ги напиша Варух, синот на Нирија, син на Масија, син на Седекија, син на Асадија, син на Хелкија — во Вавилон,

²во петтата година, во седмиот ден од месецот, во она време кога Халдејците го презедоа Ерусалим и го изгореа со оган.

³Ги прочита Варух гласно зборовите од оваа книга пред Јехонија, синот на Јоакима, јудејски цар, пред сиот народ, што беше дошол да ја слуша книгата,

⁴гласно пред кнезовите и царските синови, пред сите кои живееја во Вавилон, покрај реката Суд,

⁵и тие плачеа, постеа и се молеа пред Господа.

⁶Собраа сребро, секој според своите можности,

⁷и го испратија во Ерусалим до првосвештеникот Јоаким, син на Хелкија, син Саломов, до свештениците и до сиот народ, кој се наоѓаше со него во Ерусалим,

⁸кога Варух ги зеде однесените садови од домот на Господа, за да ги врати во Јудејската земја, во десетиот ден од месецот Сиван, сребрените садови, што ги беше направил јудејскиот цар Седекија, син Јосиин,

⁹откако Навуходоносор, вавилонски цар, ги беше преселил од Ерусалим Јехонија и кнезовите, од затворениците, војводите и народот во Вавилон.

¹⁰И рекоа тие: »Еве, ви испраќаме сребро, со него купете сепаленици, жртви за грев и темјан, принесете ги на дар и ставете ги на жртвеникот на Господа, нашиот Бог,

¹¹молете се на Господа за Навуходоносора, вавилонскиот цар, и за животот на неговиот син Валтазара, така што деновите на нивниот живот на земјата да бидат како денови на небото.

¹²Господ Бог ќе ни даде сила и ќе ги просвети нашите очи, за да живееме под закрилата на вавилонскиот цар Навуходоносора и под закрилата на неговиот син Валтазара, за да им служиме многу дни и да најдеме милост пред нив.

¹³Молете Му се на Господа, нашиот Бог, и за нас, зашто згрешивме пред Господа, нашиот Бог, и не се одврати гневот на Господа од нас до денес.

¹⁴Прочитајте ја оваа книга, која ви ја испраќаме, за да се објави во домот на Господа, во ден празничен и во дни бележити.«

¹⁵Тогаш речете: »Правдата е во Господа, нашиот Бог, а кај нас е — срамот на лицата како денес на сите Јудејци и на оние што живеат во Ерусалим,

¹⁶на царевите и на кнезовите, на нашите свештеници, нашите пророци и нашите татковци,

¹⁷зашто згрешивме пред Господа,

¹⁸не Му се покорувавме и не го слушавме гласот на Господа, нашиот Бог, за да живееме според заповедите на Господа, нашиот Бог, и не ни беше грижа што гласот Негов не го слушавме.

¹⁹Од денот, кога Господ ги изведе нашите татковци од Египетската земја, па до денес, ние бевме непослушни пред Господа, нашиот Бог, и не ни беше грижа што гласот Негов не го слушавме.

²⁰Затоа нѐ постигнаа неволји и клетва, како денес, што ги одреди Господ пред својот слуга Мојсеја во оној ден, кога нашите татковци излегоа од Египетската земја, за да ни ја даде земјата, во која тече мед и млеко.

²¹Не го слушавте гласот на Господа, нашиот Бог — во сите зборови на пророците, кои Он ни ги прати нам,

²²туку секој од нас одеше според мислите на своето лошо срце, служејќи им на други богови и вршејќи лоши дела пред очите на Господа, нашиот Бог.«