Read Свето Писмо (Гаврилова) 1990 Варух 3 Bible Online

Варух 3 - Свето Писмо (Гаврилова) 1990 bible

Варух 3

¹Господи, Седржителе, Боже Израилев, кон Тебе вика душата тескобна и дух вознемирен;

²Чуј ме, Господи, и смилуј се, зашто Ти си бог милосрден; смилувај се, зашто згрешивме пред Тебе;

³Ти вечно живееш, а ние вечно загинуваме.

⁴Господи, Седржителе, Боже Израилев, послушај ја молитвата на умрените од Израилот и на нивните синови, кои згрешија пред Тебе, кои не го послушаа гласот на Господа, својот Бог, па затоа нѐ снајдоа неволји.

⁵Не спомнувај си за беззаконијата на нашите татковци, туку спомни си во тоа време за Својата рака и за Своето име,

⁶зашто Ти си Господ, нашиот Бог и ние ќе те прославуваме, Господи!

⁷Затоа си го вселил стравот Твој во нашето срце, за да го повикуваме Твоето име, а ние ќе Те прославуваме во нашето прогонство, бидејќи од нашето срце ја отфрливме секоја неправда на нашите татковци, кои згрешија пред Тебе.

⁸Еве, ние сме сѐ уште во ова заточеништво, каде што си нѐ распрснал за хула, за проклетство, и за казна поради сите неправди на нашите татковци, кои отстапија од Господа, нашиот Бог.

⁹Чуј ги, Израиле, заповедите на животот, послушајте, за да ја научите мудроста.

¹⁰Израиле, што значи тоа што си во земјата на непријателите? Ти остаре во туѓа земја и се оскверни заедно со мртвите,

¹¹приброен си кон оние, што се во пеколот,

¹²си го остави изворот на премудроста.

¹³Ако одеше по Божјиот пат, ќе живееше мирно довека.

¹⁴Научи каде се наоѓа мудроста, каде силата, каде знаењето, а заедно со тоа да разбереш во што е долговечноста и животот и каде се наоѓа светлината на очите и мирот.

¹⁵Кој го открил живеалиштето на мудроста и кој влегол во нејзините сокровишта?

¹⁶Каде се кнезовите на народите и оние што владееја над земните ѕверови и оние што си играа со птиците небески

¹⁷и собираа сребро и злато, она на што се надеваа и чии имоти крај немаат?

¹⁸Каде се оние, кои со голем труд сребро излеваа и чии сребрени ракотворби број немаат?

¹⁹Тие исчезнаа, во пеколот слегнаа; на нивно место други се издигнаа.

²⁰Помладите видоа светлина и се населија на земјата, но патот на мудроста не го познаа;

²¹не ги разбраа нејзините патеки и нивните синови не ја најдоа; далеку останаа од нејзиниот пат.

²²Не се слушаше за неа во Ханан, ниту ја видоа во Теман.

²³Синовите на Агара бараа земно знаење. Него го бараа и трговците од Мера и Теман, како и раскажувачите на басни и истражувачите на знаењето, но патот на премудроста не го познаа и патеките нејзини не ги забележаа.

²⁴О, Израиле, колку е голем Божјиот дом, колку е пространо местото на Неговото владеење

²⁵Тој е голем и крај нема, високо е и неизмерлив;

²⁶Таму во почетокот имаше прочуени исполини, многу големи и вешти во војување,

²⁷Но не нив Господ ги избра, и не им го откри патот на премудроста;

²⁸тие изгинаа затоа што немаа мудрост, изгинаа од своето безумие.

²⁹Кој се качил на небото, па да ја дофати на облаците и да ја симне оттаму?

³⁰Кој го премина морето и ја најде неа, и кој ќе ја донесе неа — подобрата од чисто злато?

³¹Патот до неа никој не го знае и никој не помислува на нејзините патеки.

³²Но оној, кој знае сѐ, Он ја откри со разумот Свој, Оној Кој ја создаде земјата за вечни времиња и ја исполни со животни,

³³Оној, Кој ја испрати светлината — и таа оди, ја повикува — и таа со трепет Го слуша,

³⁴и ѕвездите на своите места зесветеа и се зарадуваа.

³⁵Он ги повикува, а тие Му одговараат: »Еве нѐ!« Тие радосно болснаа пред својот Создател.

³⁶Он е нашиот Бог; никој со Него не може да се спореди.

³⁷Он ги најде сите патишта на премудроста и му ја подари на Својот слуга Јакова, на Својот омилен Израил.

³⁸потоа Он се јави на земјата и живееше меѓу луѓето.