Read Свето Писмо (Гаврилова) 1990 Варух 4 Bible Online

Варух 4 - Свето Писмо (Гаврилова) 1990 bible

Варух 4

¹Еве ја книгата на Божјите заповеди и на Законот, кој трае вечно. Тие што ја пазат — вечно ќе живеат, а ќе умрат оние што ќе ја остават.

²Врати се, Јакове, и земи ја, оди по болскотот на нејзината светлина!

³Твојата слава не давај му ја на друг, ниту она што е корисно за тебе — на народ туѓ.

⁴Блажени сме Израиле, што го знаеме угодното пред Бога.

⁵Охрабри се, народе мој, ти — спомену Израилев!

⁶Вие сте предадени на незнабошците — не да загинете, туку затоа што Господа Го разгневивте;

⁷затоа што Го разгневивте Создателот свој, принесувајќи им жртви на бесови, а не на Бога.

⁸Вие го заборавивте вечниот Бог, Кој ве храни, а го ожалостивте и Ерусалим, кој ве отхрани;

⁹кога го виде испратениот врз вас од Господа гнев, рече: »Слушајте, жители сионски, Бог ми испрати голема тага.

¹⁰Јас го видов заробувањето на моите синови и ќерки, кое Вечниот го испрати на нив.

¹¹Јас ги хранев со радост, а ги отпуштив со бол и жалост.

¹²Никој нека не ми се радува на мене вдовецот, кој сум оставен од мнозина; јас опустев поради гревовите на моите деца, зашто тие се отклонија од Божјиот закон;

¹³не ги познаа Божјите наредби, не одеа по патот на Божјите заповеди и не чекореа по патеките и учењето на Неговата правда.

¹⁴Дојдете, сожители сионски, спомнете си за ропството на Моите синови и ќерки, кои Вечниот го испрати врз нив.

¹⁵Он испрати против нив народ далечен, бесрамен и туѓ — затоа што не се засрамија од старец и не се сожалија на младенец,

¹⁶на вдовицата ѝ ги одведоа нејзините мили синови, и осамената ја лишија од нејзините ќерки.

¹⁷А, пак, јас со што можам да ви помогнам?

¹⁸Оној Кој ги испрати врз вас тие зла, Он ќе ве избави од рацете на вашите непријатели.

¹⁹Дојдете, деца, дојдете, зашто запустев.

²⁰Ја соблеков облеката на мирот, а се облеков во костретот на мојата молитва: во сите мои денови Господа ќе Го повикувам.

²¹Охрабрете се, чеда, повикајте кон Господа, Он ќе ве избави од насилство и непријателски раце.

²²Зашто од почетокот се надевав на Вечниот за вашето спасение; врз Мене дојде од Светиот радост за милоста, Која скоро ќе ви дојде од Вечниот Спасител наш.

²³Јас ве испраќав со тага и со жалост, но Бог ќе ве поврати при мене со радост и веселба довека.

²⁴Зашто, како што сожителите на Сион ве видоа како ве водат во ропство, така набргу ќе го видат вашето од Бога спасение, кое ќе ви дојде со голема слава и велелепие од Вечниот.

²⁵Деца, потрпете го Божјиот гнев што ве постигна: те прогонува твојот непријател, но набргу ќе ја видиш неговата пропаст и ќе стапиш на вратот негов.

²⁶Моите чеда, со нежност одгледани, тргнаа по нерамни патишта; фатени се како стадо — разграбени од непријателот.

²⁷Охрабрете се, чеда, кон Бога викајте; за вас ќе си спомне Оној, Кој ви го испрати ова.

²⁸Каква што беше вашата решеност за да се оддалечите од Бог, зголемете ја сега десетпати — за да се свртите и да го побарате,

²⁹зашто Он, Кој ви ги испрати овие маки, Он ќе ви испрати вечна радост со спасение.

³⁰Охрабри се, Ерусалиме, Оној Кој ти го даде името — Он ќе те утеши!

³¹Тешко им на оние што те ожалостија и се радуваа на твоето паѓање!

³²Тешко им на градовите, на кои им служеа твоите деца, тешко и на земјата, што ги прими твоите синови!

³³Како што му се радуваше на твоето паѓање, и се веселеше на твојата пропаст, така ќе се ожалости за своето опустошување.

³⁴Јас ќе направам да не се радува на многу народ; фалбите нејзини во жалост ќе се претворат,

³⁵зашто врз неа ќе дојде оган до Вечниот за долги дни, и долго, долго време во неа бесови ќе живеат.

³⁶Ерусалиме, погледни кон исток, види ја радоста, што ти доаѓа од Бога.

³⁷Ете доаѓаат твоите синови, што ги отпушти, доаѓаат собрани од исток до запад, по заповед од Светецот, зарадувани со Божја слава.