Read Свето Писмо (Гаврилова) 1990 Ппророк Језекиил 13 Bible Online

Ппророк Језекиил 13 - Свето Писмо (Гаврилова) 1990 bible

Ппророк Језекиил 13

¹И би слово Господово до мене:

²»Сине човечки, изречи пророштво против пророците на Израилот, кои пророкуваат, и кажи им на оние, што пророкуваат од свое срце: чујте го словото Господово.

³Вака вели Господ Бог: тешко им на безумните пророци, што се водат од својот дух, а ништо не виделе.

⁴Твоите пророци, Израиле, се како лисици во развалини.

⁵Во пролом и вие не влегувате и не го оградувате со ѕид домот Израилев за да биде цврст при битката во денот Господен.

⁶Тие гледаат суета и претскажуваат лага, велејќи: ‚Господ вели‘, а Господ не ги испратил; и даваат надеж дека словото ќе се исполни.

⁷Зар не видовте суетно видение и не кажувате ли лажно предвестие, велејќи: ‚Господ вели‘, а Јас, пак, не сум рекол?

⁸Затоа вака вели Господ Бог: — бидејќи кажувате суета и гледате во виденијата лага, Јас сум против вас, — вели Господ Бог.

⁹И ќе биде раката Моја против тие пророци, кои гледаат суета и претскажуваат лага; во советот на Мојот народ тие нема да бидат, во списокот на домот Израилев нема да бидат запишани и во земјата Израилева нема да влезат. Па ќе познаете, дека Јас сум Господ Бог.

¹⁰Затоа што го воведуваат Мојот народ во заблуда, велејќи: — мир, а мир нема; и кога тој гради ѕид, а тие со кал го мачкаат.

¹¹Кажи им на тие што ѕидот го мачкаат со кал, дека тој ќе падне, ќе заврне силен дожд и ти, ѕиду од камен, ќе паднеш и силен ветар ќе те распарчи.

¹²И, ете, ѕидот ќе падне; нема ли тогаш да кажат: ‚Каде е мачканицата, со која го мачкавме?‘

¹³Затоа вака вели Господ Бог: Ќе пуштам разорен ветар во гневот Свој и ќе падне пороен дожд во јароста Моја, и град како камења во јадот Мој ќе биде за истребување.

¹⁴Ќе го урнам ѕидот, што го мачкавте со кал, и ќе го фрли на земја; ќе се открие темелот негов, па ќе падне, а вие заедно со него ќе загинете, и ќе познаете, дека Јас сум Господ.

¹⁵И ќа ја излеам јароста Своја врз ѕидот и врз оние што го мачкаа со кал, и ќе ви речам: — го нема ѕидот и ги нема оние, што го мачкаа —

¹⁶пророците Израилеви, кои му пророкуваа на Ерусалим и го известуваа за мирни виденија, кога мир немаше, — вели Господ Бог.«

¹⁷А ти, сине човечки, сврти го лицето свое кон ќерките на овој народ, кои пророкуваат од своето срце, и кажи пророштво против нив.

¹⁸па речи — вака вели Господ Бог: »Тешко им на оние што си пришиваат магијски амајлии под мишките и прават превези на главата за секоја возраст, само да ловат души. Зар ловејќи ги душите на Мојот народ, вие ќе си ги спасувате вашите души?

¹⁹И Ме обесчестувате пред Мојот народ за рака јачмен и за парчиња леб, умртвувајќи ги душите што не треба да умрат, а оставајќи ги да живеат оние души, што не треба да живеат, лажејќи го народот што слуша лага.«

²⁰Затоа вака вели Господ Бог: »Еве, Јас сум против вашите магиски амајлии, со кои ги ловите душите како птички, ќе ги искинам од под мишките ваши и ќе ги пуштам на слобода душите, што ги ловите како птички.

²¹Ќе ги парчосам вашите покривала и ќе го избавам Својот народ од рацете ваши; тие нема да бидат веќе плен во рацете ваши, па ќе познаете дека Јас сум Господ.

²²Поради тоа што со лага го жалостите срцето на праведникот, кого Јас не сакам да го жалостам, и ги задржувате рацете на грешникот, за да не се одврати од својот порочен пат, па не го зачува својот живот,

²³затоа нема да имате веќе суетни виденија и во иднина нема веќе да баете, Јас ќе го избавам мојот народ од рацете ваши, и ќе познаете, дека Јас сум Господ.«