Read Свето Писмо (Гаврилова) 1990 Ппророк Језекиил 14 Bible Online

Ппророк Језекиил 14 - Свето Писмо (Гаврилова) 1990 bible

Ппророк Језекиил 14

¹И дојдоа при мене неколкумина Израилеви старешини, па седнаа пред мене.

²И би слово Госпдово до мене:

³»Сине човечки, овие луѓе дозволија своите идоли да си ги стават во срцата свои, се соблазнија со своето бесчестие: можам ли да им одговорам?«

⁴Затоа зборувај со нив и кажи им — вака вели Господ Бог: »Ако некој од домот Израилев дозволи во срцето свое да има идоли и така со тоа да го соблазнува своето бесчестие, па дојде при пророк, — па зар Јас, Господ, можам ли, при толку многу идоли да му дадам одговор?

⁵Домот Израилев нека разбере во срцето свое, дека сите со своите идоли станаа туѓи за Мене.«

⁶Затоа кажи му на домот Израилев — вака вели Господ Бог: Обрнете се и откажете се од вашите идоли и од сите ваши гадотии одвратете го лицето свое.

⁷Зашто, ако некој од домот Израилев и од придојдените кои живеат при Израилот, се откаже од Мене и допушти во срцето свое да има идоли и со тоа пред лицето свое бесчести, па дојде при пророк за да ме праша преку него, — па зар Јас, Господ, треба ли да му дадам одговор од Себе?

⁸Јас ќе го свртам лицето Свое против тој човек и ќе го поразам како знак и приказ и ќе го истребам од мојот народ, и ќе познаете дека Јас сум Господ.

⁹Ако, пак, пророкот дозволи да се измами и каже збор така како Јас, Господ, да сум го научил тој пророк, тогаш Јас ќе ја протегнам раката Своја против него и ќе го истребам од народот мој, од Израилот.

¹⁰И тие обајцата ќе ја понесат вината за беззаконието. Каква ќе биде вината на оној што прашува, таква ќе биде вината и на пророкот,

¹¹та во иднина домот Израилев да не се отклонува од Мене и да не се осквернува веќе себеси со секакви свои беззаконија, туку да бидат Мој народ и Јас да бидам нивни Бог, — вели Господ Бог.

¹²И би слово Господово до мене:

¹³»Сине човечки, ако некоја земја ќе згрешеше пред Мене, вероломно отстапувајќи од Мене, и Јас ја протегнам врз неа раката Своја, ја уништував при неа лебната потпора, праќав врз неа глад и почнував по неа да ги погубувам луѓето и добитокот,

¹⁴па, ако се најдеа во неа тројца мажи: Ное, Данаиил и Јов, тие со својата праведност ќе можеа да ги спасат само своите души, вели Господ Бог.

¹⁵Или, ако пратев врз таа земја лути ѕверови што би ја осиромашиле, и таа поради ѕверовите стане пуста и непреодна.

¹⁶тоа тројцата тие мажи во неа да се — жив сум Јас, вели Господ Бог, не би ги спасиле ни синовите ни ќерките, а само тие би се спасиле, земјата пак би останала пуста.

¹⁷Или, ако пратев врз таа земја меч и му реков: ‚мечу мини преку земјата!‘, и тој почнеше да истребува по неа луѓе и добиток,

¹⁸тоа само тие тројца мажи среде неа — жив да сум Јас, вели Господ Бог, не би ги спасиле ни синовите ни ќерките, а би се спасиле само тие.

¹⁹Или, да бев пратил врз таа земја помор и да бев ја излеал врз неа јароста Своја во крвопролевање, за да истребувам во неа луѓе и добиток,

²⁰тоа Ное, Даниил и Јов среде неа — жив да сум Јас, вели Господ Бог, не би ги спасиле ни синовите ни ќерките; со својата праведност тие би ги спасиле само своите души.«

²¹Зашто така вели Господ Бог: »Ако и четирите мои тешки поразии — мечот и гладот, лутите ѕверови и поморот — би ги пратил врз Ерусалим за да истребуваат во него луѓе и добиток,

²²и тогаш ќе остане во него само остатокот на синовите и ќерките, што нема да бидат изведени оттаму; ете, тие ќе дојдат при вас и вие ќе го видите поведението нивно и делата нивни, па ќе се утешите за онаа беда, што ја пратив врз Ерусалим, за сѐ што пратив врз него.

²³Тие ќе ве утешат, кога ќе го видите нивното поведение и делата нивни; и ќе познаете дека не залудо Јас го извршив сето тоа, што го извршив во него«, вели Господ Бог.