Read Свето Писмо (Гаврилова) 1990 Ппророк Језекиил 39 Bible Online

Ппророк Језекиил 39 - Свето Писмо (Гаврилова) 1990 bible

Ппророк Језекиил 39

¹Ти, сине човечки, изречи пророштво против Гога и кажи — вака вели Господ Бог: »Еве, Јас сум против тебе, Гог, кнезу на Рош, Месех и Тувал.

²Ќе те вратам и ќе те поведам, ќе те изведам од северните предели и ќе те доведам на планините Израилеви.

³Ќе го исфрлам лакот од твојата лева рака и ќе ти ги исфрлам стрелите од твојата десна рака.

⁴Ќе паднеш на Израилевите планини, ти и твоите полкови и народите што ќе бидат со тебе; ќе дозволам да те изедат секакви грабливи птици и ѕверови полски.

⁵Ќе паднеш на откриено поле, оти Јас го реков тоа, вели Господ Бог.

⁶И ќе испратам оган врз земјата Магог и врз жителите на островите, кои живеат безгрижно, па ќе познаат дека Јас сум Господ.

⁷Ќе го покажам Своето свето име меѓу Мојот народ, Израилот, и нема веќе да дозволам во иднина да се обеславува името Мое, свето, па ќе познаат народите дека Јас сум Господ, Светецот Израилев.

⁸Ете, тоа ќе дојде и ќе се збидне, вели Господ Бог, тоа е денот, за кој ви зборував.

⁹Тогаш жителите на градовите Израилеви ќе излезат, ќе запалат оган и ќе го изгорат оружјето, штитовите и железните ризници, лаковите и стрелите, боздоганите и копјата: седум години ќе ги горат.

¹⁰И нема да носат дрва од полето, ниту пак ќе сечат од горите, туку ќе го горат само оружјето; ќе ги ограбат своите грабители и ќе ги оберат своите обирачи, вели Господ Бог.

¹¹Во тој ден ќе му дадам на Гога место за гробница при Израилот во долината на патниците, источно од морето, и таа таму ќе ги задржува патниците: таму ќе го погребуваат Гога и сета негова војска, а ќе ја наречат долината на Гоговиот народ.

¹²Домот Израилев ќе ги погребува седум месеци, за да ја очисти земјата.

¹³И сиот народ од земјата ќе ги погребува, и за нив тој ден ќе биде знаменит, во кој Себе ќе се прославам, вели Господ Бог.

¹⁴И ќе определат луѓе, кои постојано ќе го обиколуваат пределот и со помош на патниците да се погребуваат другите по лицето земјино, — за да ја очистат; по седум месеци тие ќе почнат да бараат.

¹⁵И кога некој од оние, што ќе минуваат по земјата, ќе види човечка коска, ќе стави до неа знак, додека погребувачите не ја закопаат во долината на Гоговата војска.

¹⁶Името на градот ќе му биде пак — Хамона (народ). Така ќе го очистат тие пределот.«

¹⁷А ти, пак, сине човечки, — така вели Господ — кажи им на сите видови птици и на сите ѕверови полски: соберете се и дојдете, побрзајте од сите краишта кон Мојава жртва, што Јас ќе ја заколам за вас, кон големата жртва на планините Израилеви, и ќе јадете месо и ќе пиете крв;

¹⁸месо од силни мажи ќе јадете и ќе пиете крв од кнезови земни, од овни, од јагниња, од козли и од телиња — сите тие се згоени во Васан,

¹⁹ќе јадете мрс до наситување и ќе пиете крв до опивање од Мојата жртва, што Јас ќе ја заколам за вас.

²⁰И на Мојата трпеза ќе се наситите на коњи и коњаници, на мажи силни, на секаков вид воени лица, вели Господ Бог.

²¹Ќе ја покажам славата Своја, меѓу народите и сите народи ќе го видат Мојот суд, што Јас ќе го одржам, и Мојата рака, што Јас ќе ја кренам врз нив.

²²И ќе узнае домот Израилев дека Јас сум Господ Бог нивни од денес и натаму.

²³Ќе познаат народите дека домот Израилев беше преселен поради својата неправда; оти тие постапија вероломно пред Мене, Јас го сокрив од нив лицето Мое и ги предадов во рацете на непријателите нивни, и тие сите паднаа од меч.

²⁴Поради нечистотиите нивни и поради гревовите нивни Јас го направив тоа со нив и го сокрив од нив лицето Мое.

²⁵Затоа вака вели Господ Бог: сега ќе ги вратам плениците на Јакова, ќе се смилувам над сиот дом Израилев и ќе бидам ревнив на името Мое свето.

²⁶Па ќе го почувствуваат тие своето бесчестие и сите свои беззаконија, што ги вршеа пред Мене, додека уште живееја во земајта своја во мир, ќе заживеат спокојно, и немаше никој да ги заплашува.

²⁷кога ќе ги вратам од кај народите и ги соберам од земјите на нивните непријатели и ја покажам во нив светоста Моја пред очите на многу народи.

²⁸И ќе познаат дека Јас сум нивниот Господ Бог, Кој откако ги растурив меѓу народите, одново ќе ги соберам во нивната земја и нема да оставам таму ниту еден од нив.

²⁹И веќе нема да го сокривам лицето Свое од нив, затоа што ќе излеам Јас од Мојот дух на домот Израилев, вели Господ Бог.