Read Свето Писмо (Гаврилова) 1990 Осија 10 Bible Online

Осија 10 - Свето Писмо (Гаврилова) 1990 bible

Осија 10

¹Израилот е разгранета лоза; колку повеќе таа има плод, толку повеќе се умножуваат жртвениците; колку му е подобра земјата, толку повеќе се украсуваат идолите.

²Разделено е срцето нивно, и затоа ќе бидат казнети: Он ќе ги разруши нивните жртвеници, ќе ги здроби идолите нивни.

³Сега тие велат: »Немаме цар, зашто не се уплашивме од Господа, а царот — што ќе ни прави тој?«

⁴Зборуваат, даваат лажни завети, склучуваат сојузи; затоа над нив ќе има суд, како трева отровна по браздите на нивните ниви.

⁵За телето во Бет-Авен ќе затреперат жителите на Самарија; ќе заплаче за него народот негов, и жреците негови, кои се радуваа со него, ќе плачат за славата негова, оти неа ќе ја снема од него.

⁶И тој самиот ќе биде врзан и одведен во Асирија како дар на царот Јарим; посрамен ќе биде Ефрем, и ќе се засрами Израилот поради својот заговор.

⁷Ќе го отфрли Самарија својот цар, како пена над вода.

⁸И ќе бидат истребени идолските светилишта на Авен, гревот Израилев; во трње и боцки ќе обраснат жртвениците негови, па ќе им речат на планините — покријте нѐ, а на ридовите, паднете врз нас!

⁹Повеќе згреши, Израиле, отколку во деновите на Гива; таму тие опстојаа, војната во Гаваон против синовите на беззаконието не ги постигна.

¹⁰По своја желба ќе ги казнам; ќе се соберат против нив народите, и тие ќе бидат заробени поради двојниот нивни престап.

¹¹Ефрем е обучена јуничка, свикната да врши, и Јас Самиот на нејзиниот убав врат ќе ѝ ставам ам; па Ефрем ќе влече, Јуда ќе ора, а Јаков ќе брани.

¹²Сејте правда — па да пожнеете милост; разорувајте ја рамнината, оти време е да Го побарате Господа, и така Он, штом ќе дојде, да ве одржи во правда.

¹³Одгледавте беззаконие — ожнеевте нечестие, јадевте плод на лагата, оти ти се надеваше на својот пат, на многуте војници.

¹⁴И ќе се појави смут во твојот народ, и сите твои тврдини ќе бидат разрушени, како што Салман го разруши Бет-Арбел во денот на битката: мајка биваше убивана заедно со децата.

¹⁵Ете, така ќе направам, доме Израилев, поради неправдата ваша.