Read Свето Писмо (Гаврилова) 1990 Осија 12 Bible Online

Осија 12 - Свето Писмо (Гаврилова) 1990 bible

Осија 12

¹Ефрем пасе ветар и трча кон источниот ветар, секој ден ја зголемува лагата и запустувањето, склучува сојуз со Асур, а во Египет праќа елеј.

²Но и со Јуда Господ ќе има суд — и Он ќе го посети Јакова по патиштата негови, и Ќе му даде според делата негови.

³Уште во утробата мајчина тој го задржуваше брата си, а кога порасна, тој се бореше и со Бога.

⁴Он се бореше против Ангел — и го победи; заплака и Го замоли; во Ветил Он нѐ најде и таму зборуваше со нас.

⁵А Господ е Бог Саваот; Јехова е името Негово.

⁶Обрни се и ти кон својот Бог; биди милостив и правичен, и секогаш надевај се на твојот Бог.

⁷Хананеецот има неверни мерила во раката своја и сака да онеправдува;

⁸И Ефрем вели: »Сепак се збогатив, насобрав многу имот, макар што во сите мои работи не можат да најдат ништо незаконско, што би било грев.«

⁹Јас, пак, твојот Господ Бог уште од земјата Египетска, пак ќе те населам да седиш во сеници како во деновите на празникот.

¹⁰Јас им зборував на пророците и ги умножував виденијата, а и преку пророците се служев со споредувања.

¹¹Ако Галад стана Авен, тоа и тие станаа суетни, во Галгал колеа за жртви телци, а жртвениците им стоеја како купишта камења на меѓите од нивните ниви.

¹²Избега Јаков на нивите сириски и Израил служеше за жена, а за жена и овци пасеше.

¹³Преку пророк го изведе Господ Израилот од Египет и преку пророк Он го пази.

¹⁴Ефрем многу Го разгневи Господа, па затоа Господ ќе ја остави крвта негова на него, и ќе му го врати срамот негов.