Read Свето Писмо (Гаврилова) 1990 Осија 5 Bible Online

Осија 5 - Свето Писмо (Гаврилова) 1990 bible

Осија 5

¹Чујте го ова свештеници, и внимавај ти, доме Израилев, и приклони го увото, доме царев, оти вам ќе ви се суди, зашто бевте замка во Масифа и оптегната мрежа во Тавор.

²Длабоко потонаа во расипаност, но Јас ќе ги казнам сите нив.

³Ефрема Јас го познавам, но и Израилот не е сокриен од мене; оти и ти блудствуваш, Ефреме, а ти, Израиле, се оскверни.

⁴Делата нивни не ги оставаат да се обрнат кон својот Бог, оти блудството нивно, е внатре во нив, па затоа и Господа не Го познаваат.

⁵И гордоста на Израилот е понизена во очите нивни; затоа и Израил и Ефрем ќе паднат поради беззаконијата свои; а ќе паде и Јуда со нив.

⁶Со овците свои и со воловите свои ќе тргнат да Го бараат Господа и нема да Го најдат; Он се оттргнал од нив.

⁷Тие го изневерија Господа, зашто изродија туѓи деца; и сега новата месечина ќе ги проголта заедно со имотите нивни.

⁸Затрубете со рог во Гива, со труба во Рама, и викајте во Бет-Авен: »По тебе, Венијамине!«

⁹Во денот на казнувањето Ефрем ќе стене пустиња; Јас го соопштив тоа меѓу колената Израилеви.

¹⁰Водачите на Јуда останаа како оние што преместуваат меѓи; ќе го излеам врз нив гневот Мој како вода.

¹¹Ете, Ефрем е угнетен, поразен е преку суд, оти посака да оди по суетни работи.

¹²И ќе биде како молец за домот на Ефрема и како црв за домот на Јуда.

¹³Ја виде Ефрем болеста своја и Јуда раната своја; и тргна Ефрем кон Асур и прати по царот Јарим за да го брани; но тој не ќе може да ве излекува, и нема да ви ја исцели раната ваша.

¹⁴Оти Јас сум како лав за Ефрема и како лавче за домот на Јуда; Јас, Јас ќе раскинам и ќе си заминам; ќе однесам и никој нема да ги спаси.

¹⁵Ќе тргнам и ќе се вратам во Своето место, додека тие не признаат оти се виновни, и не го побараат лицето Мое.