Read Свето Писмо (Гаврилова) 1990 Јоил 2 Bible Online

Јоил 2 - Свето Писмо (Гаврилова) 1990 bible

Јоил 2

¹Трубете со труби на Сион и викајте на Мојата света гора; нека треперат сите жители земни, оти настапува денот Господен, бидејќи е близу,

²денот на темнина и мрак денот облачен и маглив: како зората ќе се шири по горите многуброен народ и силен каков што немало од векот и каков што не ќе има потоа од род во род.

³Пред него оган ќе голта, а зад него пламен ќе пали; пред него е земјата како Едемска градина, а зад него земјата ќе биде опустошена како пустиња, и за никого од него нема да има спас.

⁴Изгледаат како коњи, потскокнуваат како коњаници,

⁵скокаат преку горските врвови како со тропот од коли, како праскот од огнен пламен, кој гори слама — како силен народ построен за борба.

⁶Штом ќе се појави, ќе затреперат народите; лицата на сите ќе им пребледат.

⁷Како борци ќе трчаат и како храбри борци ќе се искачуваат по карпите, и секој ќе си оди по својот пат и нема да се отстранува од патот свој.

⁸И нема да се притискаат еден со друг, а ќе паѓаат врз копја, но ќе остануваат неповредени.

⁹Ќе трчаат по градот, ќе се искачуваат по ѕидовите, ќе влегуваат во куќите, ќе влегуваат и низ прозорците како крадачи.

¹⁰Пред нив ќе се потресе земјата, ќе се расклати небото, сонцето и месечината ќе потемнат, а и ѕвездите ќе ја изгубат светлината своја.

¹¹И Господ ќе го пушти гласот Свој пред Својата војска, зашто силата воинствена Негова е многу голема, и силен е оној што ќе ја извршува волјата Негова; оти голем е денот Господен и многу е страшен, и кој ќе истрпи?

¹²Но и уште сега вели Господ: обрнете се кон Мене од сѐ срце со пост, плач и ридание.

¹³Раскинете ги срцата свои, а не облеката и обрнете се кон Господа вашиот Бог: зашто Он е благ и милосрден, долготрпелив и многумилостив и сожалува за злото.

¹⁴кој знае дали нема да се смили и дали ќе остави благослов: лебен принос и прелив за Господа, вашиот Бог?

¹⁵Затрубете со труба на Сион, наредете пост и објавете свечен собир.

¹⁶Соберете го народот, свикајте собир, поканете ги и старците, соберете ги децата и цицалчињата; нека излезе младоженецот од својата одаја и невестата од својата горна одаја.

¹⁷Меѓу тремот и жртвеникот нека плачат свештениците, служителите на Господа и нека велат: »Смилувај се, Господи, над народот Свој, не предавај го наследството Свое на срам, та да не се подигруваат со него народите! Зошто меѓу нив да се зборува — каде е нивниот Бог?«

¹⁸Тогаш Господ ќе поревнува за земјата Своја, па ќе се смили и на народот Свој.

¹⁹Тогаш ќе одговори Господ и ќе му рече на народот Свој: »Еве, Јас ќе ви пратам леб, вино и елеј, и ќе се наситите со тоа, и нема повеќе да ве предавам на поруга пред народите.

²⁰И непријателот од север ќе го мавнам и ќе го протерам во безводна и пуста земја — предната сила — во источното море, а задната — во западното море, и ќе се крене омразата од него, и ќе се почувствува смрдеа, зашто тој беше направил големо зло.

²¹Не бој се, земјо; радувај се и весели се, зашто голем е Господ и може да го направи тоа.

²²Не бојте се ѕверови полски, зашто пасиштата на пустињата ќе се наполнат со трева, дрвјата ќе го дадат својот плод, смоквата и лозјата ќе ја покажат својата сила.

²³А и вие, чеда Сионови, радувајте се и веселете се во Господа, вашиот Бог; оти Он ќе ви дава умерен дожд, па ќе ви праќа дожд — дожд ран и дожд доцен, како и порано.

²⁴И ќе се наполнат гумната со жито и ќе се преполнат бочвите со гроздов сок и со елеј.

²⁵И ќе ви надоместат за оние години, кога испојадоа сѐ скакулците, црвите, бумбарите и гасениците — Мојата голема војска што ја пратив против вас.

²⁶И до наситка ќе јадете и ќе се наситувате и ќе го славите името на Господа, вашиот Бог, Кој пред вас изврши големи чудеса, така што Мојот народ нема да се посрами довека.

²⁷И ќе познаете дека Јас сум меѓу Израилот и дека Јас сум Господ, вашиот Бог, и дека нема друг, и Мојот народ нема да се посрами довека.

²⁸И, ете, потоа ќе излеам од Мојот Дух врз секоја плот, и синовите ваши и ќерките ваши ќе пророкуваат; старците ваши ќе сонуваат соништа и младите ваши ќе гледаат виденија.

²⁹А и врз слугите и слугинките во оние денови ќе излеам од Мојот Дух.

³⁰И ќе покажам знаци на небото и на земјата: крв, оган и столбови од дим.

³¹Сонцето ќе се преобрати во темнина, а месечината — во крв, пред да настапи денот Господен, великиот и страшниот.

³²Тогаш секој, што ќе го призовува името Господово, ќе се спаси; бидејќи на гората Сион и во Ерусалим ќе има спасение, како што вели Господ, а и по другите места, што ќе ги повика Господ.«