Read Свето Писмо (Гаврилова) 1990 Броеви 1 Bible Online

Броеви 1 - Свето Писмо (Гаврилова) 1990 bible

Броеви 1

¹И му рече Господ на Мојсеја во Синајската пустиња, во скинијата на сведоштвото, во првиот ден од вториот месец, на втората година, откако беа излегле од Египетската земја, велејќи:

²»Пребројте ја целата заедница на Израилеви синови според родовите нивни, според челадта нивна, според бројот на имињата нивни, сите од машки пол до еден;

³од дваесет години нагоре, сите способни кај Изаилот за војна; според доброволечките чети пребројте ги ти и Арон;

⁴заедно со вас треба да има од секое племе по еден претставник, кој е старешина на родот свој.

⁵И еве ги имињата на мажите, што ќе бидат со вас: од Рувима — Елисур, синот Седиуров;

⁶од Симеона — Саламиил, синот Сурисадаев;

⁷од Јуда — Наасон, синот Аминадавов;

⁸од Исахара — Натанаил, синот Согаров;

⁹од Завулона — Елиав, синот Хелонов;

¹⁰од синовите на Јосифа: од Ефрема — Елисам, синот Емиудов; од Манасија — Гамалиил, синот Фадасуров;

¹¹од Венијамина — Авидан, синот Гадеониев;

¹²од Дана — Ахиезер, синот Амисадаев;

¹³од Асира — Фагаил, синот Ехранов;

¹⁴од Гада — Елисаф, синот Рагуилов;

¹⁵од Нефралима — Ахиреј, синот Енанов.

¹⁶Тие се избраните кнезови од народот на татковските племиња, началници на Израилевите илјадници.«

¹⁷Тогаш Мојсеј и Арон ги зедоа тие именувани мажи

¹⁸и го собраа сиот народ на првиот ден од месецот од втората година; и тие ги објавија своите родословија, според родовите свои, според домовите свои, според бројот на имињата, од дваесет години и нагоре, сите до еден од машки пол,

¹⁹како што му беше заповедал Господ на Мојсеја. И тој го изврши пребројувањето нивно во Синајската пустиња.

²⁰Од синовите на Рувима, првородениот син на Израила, според родовите нивни, според домовите нивни, според бројот на имињата, сите до еден, сите од машки пол, од дваесет години нагоре, сите способни за војна.

²¹Се изброија од племето Рувимово четириесет и шест илјади и петстотини.

²²Од синовите Семеонови според родовите нивни, според домовите нивни, според бројот на имињата, сите до еден, сите од машки пол, од дваесет години нагоре, сите способни за војна,

²³се изброија од племето Симеонови песедет и девет илјади и триста.

²⁴Од синовите Јудини според родовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

²⁵изброија од племето Јудино седумдесет и четири илјади и шестотини.

²⁶Од синовите Исахарови според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

²⁷се изброија од племето Исахарово педесет и четири илјади и четиристотини.

²⁸Од синовите Завулонови според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

²⁹се изброија од племето Завулоново педесет и седум илјади и четиристотини.

³⁰Од синовите на Јосифа, синовите Ефремови, според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

³¹се изброија од племето Ефремово четириесет илјади и петстотини.

³²Од синовите Манасиеви според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

³³се изброија од племето Манасиево триесет и две илјади и двесте.

³⁴Од синовите Венијаминови според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

³⁵се изброија од племето Венијаминово триесет и пет илјади и четиристотини.

³⁶Од синовите Гадови според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

³⁷избројувањето од племето Гадово изнесува четириесет и пет илјади и шестотини и педесет.

³⁸Од синовите Данови според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

³⁹се изброија од племето Даново, шеесет и две илјади и седумстотини.

⁴⁰Од синовите Асирови според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите способни за војна,

⁴¹се изброија од племето Асирово четириесет и една илјада и петстотини.

⁴²Од синовите Нефталимови според родовите нивни, според домовите нивни, според бројот на имињата нивни, еден по еден, сите од машки пол, од дваесет години нагоре, сите сопсобни за војна,

⁴³се изброија од племето Нефталимово педесет и три илјади и четиристотини;

⁴⁴тоа се оние, што влегоа во пребројувањето и што ги преброи Мојсеј и Арон и началниците Израилеви — дванаесетмина луѓе, по еден човек од секое племе — според племињата народни.

⁴⁵Сите, влезени во пребројувањето, синовите Израилеви, од дваесет години и нагоре, сите од Израилот способни за војна,

⁴⁶изброени беа шестотини и три илјади и петстотини и педесет.

⁴⁷А левитите меѓу нив не беа броени според татковите им племиња.

⁴⁸И му рече Господ на Мојсеја, велејќи:

⁴⁹»Само Левиевото колено не вбројувајте го и тие бројки не мешај ги со синовите на Израилот;

⁵⁰но на левитите довери им ја скинијата на сведоштвото, сите нејзини принадлежности и си што е во неа: тие нека ја носат скинијата и сите нејзини принадлежности и да служат во неа, и околу скинијата да бидат распоредени;

⁵¹а кога ќе треба да се пренесува скинијата, левитите да ја креваат, и кога ќе треба да се застане, левитите да ја симнат; ако, пак, до неа пристапи некој од друго племе, да биде убиен.

⁵²Синовите Израилеви треба да бидат распоредени секој според својот чин, и секој според своето старешинство, способен да војува.

⁵³А левитите да се сместат од спротивната страна, околу скинијата на сведоштвото, за да не падне гнев врз општеството на синовите Израилеви; левитите сами да стојат на стража при скинијата на сведоштвото.«

⁵⁴И направија синовите Израилеви сѐ онака како што му заповеда Господ на Мојсеја; така направија.