Read Свето Писмо (Гаврилова) 1990 Броеви 10 Bible Online

Броеви 10 - Свето Писмо (Гаврилова) 1990 bible

Броеви 10

¹И му рече Господ на Мојсеја, велејќи:

²»Направи си две сребрени труби, ковани направи ги, за да ти служат да го собираш народот и да ги креваш полковите.

³А кога ќе затрубиш со нив, да се собере кај тебе целото општество пред влезот од скинијата на сведоштвото.

⁴Кога ќе се затруби со едната труба, да дојдат кај тебе кнезовите и војводи Израилеви.

⁵Кога ќе затрубите за поаѓање, да се кренат оние полкови, што се сместени кон исток.

⁶Кога ќе затрубите по вторпат за поаѓање, тогаш да се кренат полковите, што се сместени кон југ; штом ќе затрубите по третпат за поаѓање, нека се кренат полковите што се настанети кон морето; кога по четврти пат ќе дадете знак, да се кренат полковите, што се настанети кон север; да се труби кога се тргнува на пат.

⁷Кога, пак, се свикува собранието, трубете, но не со знак.

⁸Со трубите да трубат Ароновите синови, свештениците: тоа да ви биде вечен закон во родовите ваши.

⁹И кога ќе се кренете да ја браните земјата ваша од непријателот, кој оди против вас, трубете со знак, и Господ, Бог ваш, ќе си спомни за вас, и вие ќе се избавите од непријателите ваши.

¹⁰И во деновите на веселбата ваша, и во празниците свои, и во новомесечијата свои трубете за сепаленица, а при жртвите ваши за спасение, — и тоа да биде сеќавање пред вашиот Бог: Јас сум Господ, Бог ваш.«

¹¹На втората година, во вториот месец, на дваесеттиот ден од месецот, облакот се крена од скинијата на сведоштвото.

¹²Тогаш синовите Израилеви појдоа од Синајската пустиња со имотите свои, и облакот застана во пустињата Фаран.

¹³И се кренаа тие за првпат, по заповед на Господа, дадена преку Мојсеја.

¹⁴Прво беше кренато знамето, што беше во полето на синовите Јудини, според доброволците нивни; над војската Јудина беше Наасон, Аминадавовиот син;

¹⁵над војската од племето на синовите Исахарови беше Натанаил, Согаровиот син;

¹⁶над војската од племето на синовите Завулонови беше Елиав, Хелоновиот син;

¹⁷И се кренаа синовите Гирсонови и синовите Мерариеви, кои ја носеа скинијата.

¹⁸А беше кренато и знамето во полкот на синовите Рувимови со нивната војска; и над војската Рувимова беше Елисур, Седиуровиот син;

¹⁹а над војската од племето на синовите Симеонови беше Саламиил, Сурисадаевиот син;

²⁰над војските, пак, од племето на синовите Гадови беше Елисаф, Рагуилов син.

²¹Потоа тргнаа Каатовите синови, носејќи го светилиштето; и скинијата ја поставуваа онде, каде што пристигнуваа.

²²И се крена знамето во полкот на синовите Ефремови со војската негова; и над војската Ефремова беше Елисам, Емиудовиот син;

²³а над војската од племето на синовите Манасиеви беше Гамалиил, Фадасуровиот син;

²⁴над војската пак, од племето на синовите Венијаминови беше Авидан, Гадеониевиот син.

²⁵Последно меѓу сите полкови беше кренато знамето во полкот на синовите Данови со војската нивна; и над војската Данова беше Ахиезер, Амисадаевиот син;

²⁶а над војската од племето на синовите Асирови беше Фагаил, Ехрановиот син.

²⁷над војската пак, од племето на синовите Нефталимови беше Ахиреј, Енановиот син.

²⁸Тоа се полковите на синовите Израилеви со војските нивни. И тргнаа.

²⁹И му рече Мојсеј на Јовав, Рагуиловиот син, Мадијамецот, Мојсеевиот тест: »Ние одиме во она место, за кое Господ рече: ‚вам ќе ви го дадам.‘ Дојди со нас, ќе ти направиме добро, зашто Господ вети многу добрини за Израилот.«

³⁰Но тој му одговори: »Нема да дојдам; ќе отидам во земјата своја, при родот свој ќе појдам.«

³¹А Мојсеј му рече: »Не оставај ни, зашто ти беше со нас во пустињата, и при нас ќе бидеш старешина.

³²Ако појдеш со нас, оние добра, што Господ нам ќе ни ги направи, ќе ти ги направите и ние тебе.«

³³И изминаа од планината Господова три дена пат, и ковчегот на заветот Господов одеше пред нив на три дена пат, за да им одбере место, каде да се сместат.

³⁴И облакот Господов ги осенуваше дење, кога тргнуваа од логорот.

³⁵Кога ковчегот се креваше за пат, Мојсеј велеше: »Стани, Господи, за да се растурат Твоите непријатели, и да избегаат од Твоето лице оние, што Те мразат!«

³⁶А кога ковчегот се запираше, тој велеше: »Врати се, Господи, кај илјадите и десетиците илјади Израилеви!«