Read Свето Писмо (Гаврилова) 1990 Броеви 15 Bible Online

Броеви 15 - Свето Писмо (Гаврилова) 1990 bible

Броеви 15

²»Кажи им на синовите Израилеви и речи им: ‚Кога ќе влазете во земјата, во која ќе живеете и која ви ја давам,

³и почнете да принесувате на Господа сепаленици, или жртви заклани, или по завет, или од сесрдност, или во текот на празниците ваши, нека биде со пријатен мирис пред Господа, тоа да биде жртва од стадата на говедата или од овците ваши;‘

⁴тогаш оној, кој ја принесува жртвата на Господа, треба да принесе и дар принос на Господа од една десетина ефа пченично брашно, измешано со четврт ин елеј;

⁵и вино за прелив принесувај по чеврт ин за сепаленица, или приклана жртва: по едно јагне за благопријатен мирис пред Господа.

⁶И овен кога принесувате за сепаленица, принесувајте и жртва, принос две десетини ефа пченично брашно, измешано со една третина ин елеј;

⁷и вино за прелив принеси една третина ин за благопријатен мирис пред Господа.

⁸Ако принесувате сепаленица од говедата, или клана жртва, за да ти е молитвата поусрдна пред Господа, или жртва за спасение,

⁹тогаш заедно со телето принесете и принос три десетини ефа пченично брашно, измешано со половина ин елеј,

¹⁰и вино за прелив принесете половина ин како жртва, за благопријатен мирис пред Господа.

¹¹Така прави при секој принос на теле, на овен, и на јагне од овците или од козите;

¹²според бројот на жртвите, што ги принесувате, така правете при секоја од нив, според бројот нивни.

¹³Секој тукашен така треба да прави, кога сево ова го принесува како жртва за благопријатен мирис пред Господа;

¹⁴и кога меѓу вас има придојден или кој и да било меѓу вас во редовите ваши, и принесе жртва за благопријатен мирис пред Господа, и тој треба да прави така, како што правите вие;

¹⁵за вас, народот Господов, и за придојдениот, кој живее меѓу вас, наредбата да биде една, наредбата вечна во редовите ваши: што сте вие, тоа да биде и придојдениот пред Господа;

¹⁶еден закон и еднакви права да бидат за вас и за придојдениот, кој живее меѓу вас.«

¹⁷Му рече уште Господ на Мојсеја, велејќи:

¹⁸»Кажи им на синовите Израилеви и речи им: кога ќе влезете во земјата, во која ве водам,

¹⁹и ќе почнете да јадете леб од таа земја, оставете и дел за Господа;

²⁰од првините на тестото принесете; леб принесете од гумното.

²¹Така одвојувајте го лебот, првина на тестото ваше и принесувајте Му на Господа во родовите ваши.

²²Ако погрешите и не ги исполнувате сите тие заповеди, кои Господ му ги кажа на Мојсеја,

²³си она, што ви заповеда Господ Бог преку Мојсеја, од денот, кога Господ ви заповедал, и за во иднината во родовите ваши, —

²⁴ако грешката е направена неволно од народот, тогаш целото општество нека принесе едно теле без недостаток за сепаленица, за благопријатен мирис на Господа, заедно со тоа и принос за прелив, според наредбите, и едно јаре од козите — жртва за грев.

²⁵И свештеникот да се помоли за целото општество на синовите Израилеви, и ќе им се прости, зашто тоа било грешка, и тие принеле свој дар на Господа, жртва за грев пред Господа, поради своето незнаење.

²⁶И ќе му биде простено на целото општество на синовите Израилеви и на придојдениот, кои живее меѓу нив, зашто целиот народ го направил тоа поради незнаење.

²⁷Ако некој сам згреши поради несакање, нека принесе едногодишна коза заради својот грев.

²⁸И свештеникот да се помоли за таа душа, која не сакајќи направила пред Господа грев, и таа ќе биде очистена и ќе и биде простено.

²⁹Еден закон да биде за вас, како за жителите од синовите Израилеви, така и за придојдениот, кој живее меѓу вас, кога некој ќе погреши не сакајќи.

³⁰Ако некој од тукашните или придојдените изврши нешто со дрска рака, тој хули на Господа; да се истреби таа душа од народот свој,

³¹зашто тој го презрел зборот на Господа и ја нарушил заповедта Негова, да биде истребена таа душа; гревот нејзин да биде врз неа.«

³²Кога синовите Израилеви беа во пустињата, најдоа еден, како собира дрва во саботен ден;

³³и оние, што го најдоа, како собира дрва во саботен ден, го приведоа кај Мојсеја и Арона и кај целото општество на синовите Израилеви;

³⁴и го затворија, бидејќи уште не беше решено, што да се прави со него.

³⁵И му рече Господ на Мојсеја: »Тој човек треба да умре; целото општество да го убие со камења надвор од населбата.«

³⁶Тогаш целото општество го изведе надвор од населбата, и го убија со камења, и тој умре, како што му заповеда Господ на Мојсеја.

³⁷И му рече Господ на Мојсеја, велејќи:

³⁸»Објави им на синовите Израилеви и кажи им да си прават реси по полите на своите облеки во поколенијата свои, и во ресите, што се по полите, да влегуваат нишки од сина преѓа,

³⁹и тие да ви бидат на ресите, па, кога ги гледате, да се спомните на сите заповеди Господови и да ги извршувате и да не се развратувате по срцето свое и очите ваши, со кои се заблудувате.

⁴⁰Да ги помните и извршувате сите Мои заповеди и да бидете свети пред вашиот Бог.

⁴¹Јас сум Господ, Бог ваш, Кој ве изведе од Египетската земја, за да ви бидам Бог. Јас сум Господ, Бог ваш.«