Read Свето Писмо (Гаврилова) 1990 Броеви 17 Bible Online

Броеви 17 - Свето Писмо (Гаврилова) 1990 bible

Броеви 17

¹И му рече Господ на Мојсеја, велејќи:

²»Кажи им на синовите Израилеви и земи од нив по еден жезал од колено, по еден жезал од секој нивни кнез, дванаесет жезла, и името на секој напиши го на жезалот;

³Ароновото име напиши го на Левиевиот жезал, зашто тие треба да дадат еден жезал, според племето на нивниот род,

⁴и стави ги во скинијата на сведоштвото, пред ковчегот на откровението, каде што ви се јавувам;

⁵и кого Јас ќе го одберам, и неговиот жезал ќе го расцутам; и така ќе го отстранам ропотот на синовите Израилеви, што го креваат против вас.«

⁶И им рече Мојсеј на синовите Израилеви, и сите началници нивни им дадоа, од секој началник по еден жезал, дванаесет жезла, според кнежествата свои и родовите нивни; и Ароновиот жезал беше меѓу жезлата нивни.

⁷Тогаш Мојсеј ги постави жезлата пред лицето Господово во скинијата на сведоштвото.

⁸На вториот ден влезе Мојсеј и Арон во скинијата на сведоштвото, и ете, Ароновиот жезал, од Левиевиот дом, беше потерал, пуштил гранчиња, процутил и родил ореви.

⁹И ги изнесе Мојсеј сите жезли од лицето Господово пред сите синови Израилеви; и тие го видоа тоа и секој си го зеде својот жезал.

¹⁰И му рече Господ на Мојсеја: »Постави го пак Ароновиот жезал пред ковчегот на откровението да се чува, како претсказание за непокорените, па ропотот против Мене да престане и тие да не изумрат.«

¹¹И Мојсеј и Арон направија така, како што му заповеда Господ на Мојсеја, така направија.

¹²И му рекоа синовите Израилеви на Мојсеја: »Ете, ние се требиме, гинеме, исчезнуваме;

¹³секој, што се приближува кон скинијата на сведоштвото Господово, умира: дали ќе изумреме така сите?«