Read Свето Писмо (Гаврилова) 1990 Броеви 20 Bible Online

Броеви 20 - Свето Писмо (Гаврилова) 1990 bible

Броеви 20

¹Тогаш синовите Израилеви, целото општество, дојдоа во пустињата Син во првиот месец, и народот се задржа во Кадес; таму умре Маријам, каде што беше и погребана.

²За народот немаше вода, и тие застанаа пред Мојсеја и Арона;

³и роптаа против Мојсеја и велеа: »О, да бевме умреле и ние тогаш, кога умреа нашите браќа пред Господа!

⁴Зошто го доведовте народот Господов во оваа пустиња, па да изумреме тука ние и добитокот наш?

⁵И зошто ни изведовте од Египет, па ни доведовте на ова лошо место, каде што не може да се сее, каде што нема ни смокви, ни лозја, ни јаболка, дури ни вода за пиење?«

⁶Тогаш Мојсеј и Арон се повлекоа од народот, кон влезот од скинијата на сведоштвото, и паднаа ничкум, и им се јави славата Господова.

⁷И му рече Господ на Мојсеја, велејќи:

⁸»Земи го жезалот свој и собери го народот, ти и братот твој Арон, и пред очите нивни кажете и на карпата пред нив и таа ќе пушти од себе вода: и така, ти ќе им дадеш вода од карпата и ќе го напоиш народот и добитокот негов.«

⁹Го зеде Мојсеј жезалот што е пред Господа, како што му заповеда Он.

¹⁰И го собраа Мојсеј и Арон народот кај карпата и тој им рече: »Чујте ме, непокорници, зар може од оваа карпа да ви извадиме вода?«

¹¹И ја крена Мојсеј раката своја и удри двапати на карпата со жезалот свој, и потече многу вода, и народот се напи, а и добитокот негов.

¹²И им рече Господ на Мојсеја и Арона: »Поради тоа што не Ми поверувавте, и не ја пројавивте Мојата светост пред очите на синовите Израилеви, вие нема да го воведете тој народ во земјата, која Јас му ја давам.«

¹³Тоа е водата кај која синовите Израилеви возроптаа пред Господа, и Он се освети пред нив,

¹⁴и испрати Мојсеј пратеници од Кадес до едомскиот цар за да му кажат: »Вака вели братот твој Израил: ти ги знаеш сите тешкотии, што ни снајдоа;

¹⁵татковците наши слегоа во Египет, и ние живеевме во Египет долго време, и Египтјаните лошо постапуваа со нас и со татковците наши;

¹⁶и повикавме кон Господа, и Он го чу нашиот глас, па испрати Ангел, и ни изведе од Египет; и ете, ние сме сега во Кадес, град до самите твои предели.

¹⁷Дозволи ни да минеме преку твојата земја: нема да одиме преку села, ниту преку лозја, и нема да пиеме вода од потоците твои: туку ќе одиме по царскиот пат, и нема да скршнуваме ни десно, ни лево, додека да ги минеме твоите предели.«

¹⁸Но Едом им рече: »Не минувај преку мене, зашто со војската ќе излезам против тебе.«

¹⁹И му рекоа синовите Израилеви: »Ќе одиме покрај гората, и ако пиеме од водата твоја, јас и добитокот мој, ќе платиме за неа; но нема да има никаква штета, зашто покрај гората ќе минеме.«

²⁰Но тој рече: »Не минувај преку мене!« И Едом излезе против него со многуброен народ и со силна рака.

²¹И така, Едом не се согласи да му дозволи на Израилот да мине преку неговите предели. И Израил се повлече од него.

²²И се кренаа синовите Израилеви од Кадес, и целиот народ стигна до планината Ор.

²³И им рече Господ на Мојсеја и Арона на планината Ор, близу до пределите на Едомската земја, велејќи:

²⁴»Нека умре Арон при народот свој, зашто тој нема да влезе во земјата, која Јас им ја давам на синовите Израилеви, затоа што Ме огорчивте кај водата на расправија.

²⁵И земи го братот твој Арона и синот негов Елеазар, и искачи ги на планината Ор пред целиот народ;

²⁶и соблечи ја од Арона облеката негова и облечи го со неа синот негов Елеазар, и нека замине Арон и нека умре таму!«

²⁷И направи Мојсеј така, како што заповеда Господ. Тие се искачија на планината Ор пред очите на целото општество,

²⁸и ја соблече Мојсеј облеката од Арона и го облече со неа синот негов Елеазар.

²⁹И умре таму Арон на врвот од планината, А Мојсеј и Елеазар слегоа од планината.

³⁰И целото општество виде дека Арон умре, целиот Израилев дом плачеше по Арона триесет дена.