Read Свето Писмо (Гаврилова) 1990 Михеј 1 Bible Online

Михеј 1 - Свето Писмо (Гаврилова) 1990 bible

Михеј 1

¹Словото Господово, упатено до Михеја од Мораст, во деновите на Јоатама, Ахаза и Езекија, цареви јудејски, со кое му беше откриено за Самарија и за Ерусалим.

²Чујте, сите народи, внимавај, земјо, и сѐ што те исполнува! Сведок нека е против вас Господ Бог, Господ од Својот свет храм!

³Зашто Господ, ете, излегува од Своето место, ќе слезе и ќе стапи на земните височини,

⁴и планините ќе се расклатат под Него, долините ќе се растопат како восок од оган, како водата што се пролива низ стрмнини.

⁵И сето тоа ќе стане поради нечесноста на Јакова, поради гревот на Израилевиот дом. Од кого е злодејанието на Јакова? Нели е тоа од Самарија? Од кого се идолските светилишта во Јудеја? Нели се тоа од Ерусалим?

⁶Затоа од Самарија ќе направам купишта урнатини во полето, место за садење лози; ќе ги сринам камењата нејзини во долина и ќе ѝ ги разголам основите.

⁷И сите нејзини резани ликови ќе се строшат и сите нивни дарови од блуд — со оган ќе бидат изгорени: сите идоли ќе ги разурнам; со дарови од блуд ги правела, и пак ќе бидат дарови од блуд превртени.

⁸Поради тоа ќе заплачам и ќе заридам, ќе појдам бос и оголен, ќе вијам како шакал, ќе плачам како змија;

⁹зашто тежок е нејзиниот пораз; тоа дојде до Јудеја, а стигна дури и до портите на Мојот народ — сѐ до Ерусалим.

¹⁰Не разгласувајте го ова во Гет, не плачете таму гласно, а во селото Офра посипете се со пепел.

¹¹Иселете се, жители сафирски, срамно разголени; нема да се спаси ни жителката санска, плачот во селото Езил нема да ви дозволи да се задржите ни таму.

¹²Тагува за своето добро жителката маротска, зашто злото од Господа слезе до портите ерусалимски.

¹³Впрегни брзи коњи во колата, жителко лахиска, ти си почеток на гревот од ќерката Сионска, оти во тебе се појавија престапите на Израилот.

¹⁴Затоа ти ќе праќаш дарови во Моресет Гет; но населбите ахзивски ќе бидат измама за царевите израилски.

¹⁵Ќе доведам и наследник при тебе, жителко мориска; и тој ќе дојде дури до Одолам, славата на Израилот.

¹⁶Фрли ја косата своја, истрижи се — од жал за своите сакани синови; разголи ја ќелавоста своја за нив како орел што ја разголува својата, зашто тие ќе бидат одведени од тебе во ропство.