Read Свето Писмо (Гаврилова) 1990 Михеј 7 Bible Online

Михеј 7 - Свето Писмо (Гаврилова) 1990 bible

Михеј 7

¹Тешко мене, зашто со мене е сега како по собирање на летните плодови, како по гроздобер; ни зрнце за каснување, ниту зрел плод, што би посакала душата моја.

²Нема веќе милосрдни по земјата, нема праведни меѓу луѓето; сите кројат сплетки, за да проливаат крв; секој му става на брата си стапица.

³Рацете им се приготвени за да прават зло: началникот сака подароци, судијата суди за поткуп, а големците пројавуваат лоши похоти на душата своја и ја изопачуваат правдата.

⁴Најдобриот од нив им е како трн, а справедливиот им е полош отколку ограда од трње. Денот на Твоите предвесници, денот на Твојата посета наближува; и сега ќе ги опфати смут.

⁵Не верувајте му на другарот, не потпирајте се на пријателот; пред онаа, што лежи во твојата постела, не отворај ја широко устата своја.

⁶Зашто синот го напаѓа татка си, ќерката се противи на мајка си, снаата станува против свекрвата; непријатели на човекот му се неговите домашни.

⁷Јас, пак, гледам кон Господа, е за моето спасение ќе се надевам на Бога; мојот Бог ќе ме чуе.

⁸Не радувај се за мене, неријателко моја! Иако сум паднат, јас ќе станам; макар што сум сега во мрак; Господа е мојата светлина.

⁹Ќе го поднесувам гневот Господен, — зашто сум згрешил пред Него — додека не го реши делото мое и не ме осуди; тогаш Он ќе ме изведе на светлина, и јас ќе ја видам правдата Негова.

¹⁰И ќе го види тоа мојата непријателка и срам ќе ја покрие онаа што ми велеше: »каде е Господ, твојот Бог?« И ќе го видат тоа очите мои — и таа ќе биде згазена како кал на улица.

¹¹Во она време, кога ќе се изѕидаат ѕидовите твои, во тоа време границите ќе се прошират надалеку.

¹²Во оној ден ќе пристигнат при тебе од Асирија до Египет, од Тир до Реката, и од море до море и од планина до планина.

¹³А таа земја ќе биде пустиња поради гревовите на жителите нејзини, и поради плодовите на делата нивни.

¹⁴Паси го со жезалот народот Твој, овците на наследството Свое, оние, што живеат обединети во гората среде Кармил, остави ги да пасат тие во Васан и Галад како во стародревните дни!

¹⁵Ќе му покажам чудесни дела како во времето кога ти излезе од Египетската земја.

¹⁶Ќе го видат тоа народите и ќе се засрамат при сета таа сила; ќе стават рака на устата своја, и ушите нивни ќе се заглушат.

¹⁷Ќе лижат прав како змии и како црвјата што излегуваат од земја, ќе излегуваат од своите гнезда; ќе се уплашат од Господа, од нашиот Бог, и ќе се уплашат од Тебе.

¹⁸Кој Бог е како Тебе, за да ги простува беззаконијата, да мине преку престапите на остатокот од Своето наследство? Он вечно не се гневи, зашто има обичај да се смилува.

¹⁹Он пак ќе се смили над нас и ќе ги избрише нашите беззаконија. Он ќе ги фрли сите наши гревови во морските длабочини.

²⁰Ти ќе покажеш верност кон домот на Јакова, милост кон Авраама, како што со клетва си им ветил на татковците наши од првите дни.