Read Свето Писмо (Гаврилова) 1990 Наум 2 Bible Online

Наум 2 - Свето Писмо (Гаврилова) 1990 bible

Наум 2

¹Се крева против тебе уништувач: пази ги тврдините, чувај го патот, зацврсти ги бедрата, собирај сили.

²Зашто Господ ќе го востанови величието на Јакова, како величието на Израилот, оти пакосници ги запустија и лозјата им ги сотреа.

³Штитот на неговите јунаци е црвен: војниците негови носат црвени облеки; колите бојни ќе фрлаат оган во денот на борбата и гора од копја ќе се лулее.

⁴Колите ќе траскаат по улиците и ќе се судираат една со друга, ќе изгледаат како запалени факели, и ќе светкаат како молњи.

⁵Тој ќе ги повикува јунаците свои, но тие ќе бидат бавни во одот, ќе побрзаат кон ѕидовите на градот, но опсадата е веќе подготвена.

⁶Вратите од реките ќе се отворат и дворот ќе се урне.

⁷Решено е: таа ќе биде оголена и во плен одведена, а слугинките нејзини ќе стенкаат како гулаби, удирајќи се в гради.

⁸Ниневија, откако беше основана, беше како водобран полн со вода, а тие бегаат. »Стојте, стојте!« Но никој не се свртува да погледа.

⁹Грабајте сребро, грабајте злато; нема крај на натрупаните скапоцени работи.

¹⁰Ограбена, опустошена и разурната е таа — срцето се топи, колената треперат; сите чувствуваат болки во бедрата, а лицата им се потемнети.

¹¹Каде е лавот што грабеше за да им носи на лавчињата и им даваше на лавиците, полнејќи ги со плен пештерите свои и леглата свои со грабеж?

¹²Каде е сега леглото на лавовите и пасиштата на лавчињата, каде што одеа лав, лавица и лавче, и никој не ги плашеше?

¹³Ете, Јас сум против тебе, вели Господ Саваот, и ќе ги претворам во дим твоите бојни коли, и меч ќе ги исече лавчињата твои, и ќе го истребам од земјата грабежот твој; повеќе нема да се чуе гласот на твоите пратеници.