Read Свето Писмо (Гаврилова) 1990 Софонија 3 Bible Online

Софонија 3 - Свето Писмо (Гаврилова) 1990 bible

Софонија 3

¹Тешко на непокорен, осквернет и насилнички град!

²Не слуша глас, не прифаќа поука, не се надева на Господа, не се приближува до Својот Бог.

³Кнезовите негови се како лавови што рикаат, судиите негови — вечерни волци, кои до утрината не оставаат ниту една коска.

⁴Пророците негови се луѓе лесномислени, неверни; свештениците негови ја осквернуваат светињата, ги газат законите.

⁵Господ е праведен среде него, не врши неправда, секое утро го произнесува Својот суд на видело, но беззаконикот не знае за срам.

⁶Јас ги истребив народите — разрушени им се тврдините; ги опустив улиците нивни, така што никој не оди по нив; разорени се градовите нивни: нема ниту еден човек, нема жител.

⁷Јас реков: »Бој се само од Мене, прими поука!« и нема да го постигне зло живеалиштето негово, какво што му бев определил; а тие грижливо се трудеа да ги расипат сите свои дела.

⁸И така, чекајте Ме, вели Господ, до оној ден, кога ќе се кренам на опустошување; зашто Јас одлучив да ги соберам народите, да ги свикам царствата, за да го излијам врз нив Моето негодување, сета јарост на Мојот гнев; зашто од огнот на јароста Моја ќе биде уништена целата земја.

⁹Тогаш Јас пак ќе им дадам на чистите народи уста да го призовуваат името на Господа и да Му служат еднодушно.

¹⁰Од краиштата отаде реката на Етиопија поклониците Мои — Моите растурени деца — ќе Ми принесат дарови.

¹¹Во тој ден ти нема да се срамуваш за твоите неразумни постапки, со кои грешеше против Мене, оти тогаш Јас ќе ги отстранам од твојата средина оние, кои залудо се фалеа со твојата слава, и нема повеќе да се гордеат на Мојата света гора.

¹²Но ќе оставам среде тебе народ смирен и прост, и тие ќе се надеваат на името Господово.

¹³Остатоците од Израилот нема да вршат неправда, нема да зборуваат лага, и во устата нивна нема да се најде јазик сплеткарски, зашто сами ќе си пасат и ќе лежат, и никој нема да ги вознемирува.

¹⁴Радувај се, ќерко Сионова, ликувај, Израиле, весели се и радувај се од сѐ срце, ќерко ерусалимска:

¹⁵Господ ја одмени пресудата над тебе, го изгони непријателот твој. Господ, Царот Израилев, е посреде тебе: нема повеќе да видиш зло.

¹⁶Во оној ден ќе му речат на Ерусалим: »не бој се« и на Сион »да не заслабнат рацете твои.«

¹⁷Господ, твојот Бог, е посреде тебе. Он е силен да те спаси; ќе се развесели за тебе со радост, ќе биде милостив според љубовта Своја, ќе се гордее за тебе со песни.

¹⁸Оние што тагуваат за празнични торжества, Јас ќе ги соберам; а тие се твои, врз нив лежи тежок укор.

¹⁹Ете, Јас ќе ги притеснам сите твои мачители во она време, ќе го спасам она што е хромо, ќе ги соберам расеаните и ќе им дадам чест и слава по целата земја, каде што биле под срам.

²⁰Во она време ќе ве доведам, во она време ќе ве соберам вас, зашто ќе ве направам прочуени и почитувани меѓу сите народи на земјата, кога ќе го вратам вашиот плен пред очите ваши, вели Господ.