Read Свето Писмо (Гаврилова) 1990 Захарија 1 Bible Online

Захарија 1 - Свето Писмо (Гаврилова) 1990 bible

Захарија 1

¹На осмиот ден, во втората година на Дарија, би слово Господово до пророкот Захарија, синот Варахиев, син Адов, велејќи:

²»Се разгневи Господ на татковците ваши со голем гнев;

³затоа кажи им — вака вели Господ Саваот — обрнете се кон Мене, — вели Господ Саваот — и јас ќе се обрнам кон вас.

⁴Не бидете како што беа татковците ваши, кон кои викаа поранешните пророци, велејќи им — ‚вака вели Господ Саваот — одвратете се од лошите работи свои!‘ Но тие не послушаа, ниту внимаваа на Мене, вели Господ.

⁵Каде се татковците ваши, па и пророците можат ли да живеат вечно?

⁶Но зборовите Мои и наредбите Мои, што им ги заповедав на слугите Мои, пророците, зар не ги постигнаа татковците ваши? И тие се обраќаа и велеа: како што беше определил Господ Саваот да постапи со нас според патиштата наши, и според делата наши, така и постапи.«

⁷На дваесет и четвртиот ден од единаесеттиот месец — а тоа е месецот Шеват — во втората година на Дарија, би слово Господово до пророкот Захариј, синот Варахиев, син Адов:

⁸Во текот на ноќата видов — ете, еден маж на црвен коњ стои меѓу мирти, што беа во долот, а зад него црвени, сиви и бели коњи,

⁹па му реков — кои се овие, господине мој? А ангелот, кој зборуваше со мене, ми рече: »јас ќе ти покажам кои се тие.«

¹⁰И одговори мажот што стоеше меѓу миртите, и рече — »тоа се оние кои Господ ги испратил да ја обиколуваат земјата.«

¹¹Тогаш тие му одговорија на ангелот Господен, кој стоеше меѓу миртите, па му рекоа — »ете, ја обиколивме целата населена земја и таа е спокојна.«

¹²Им одговори ангелот Господен и им рече: »Господи Седржителу, до кога нема да се смилуваш над Ерусалим и над градовите Јудини, на кои се гневиш, еве, веќе седумдесет години?«

¹³Тогаш во одговори на ангелот Господен, изрече Господ слова добри, слова утешни.

¹⁴И им рече ангелот, кој зборуваше со мене: — извести и кажи — вака вели Господ Саваот — »ревнувам за Ерусалим и за Сион многу;

¹⁵и негодувам со големо негодување против народите што живеат во спокој, оти Јас малку се разгневив, тие го засилија злото.«

¹⁶Затоа вака вели Господ: »Јас се обрнувам кон Ерусалим со милосрдност; во него ќе се изгради Мојот дом, вели Господ Саваот, и земномерно јаже ќе се протегне низ Ерусалим.«

¹⁷Извести го уште и за ова, и кажи — вака вели Господ Саваот: »Моите градови одново ќе се исполнат со богатства, и Господ ќе го утеши Сион и пак ќе го избере Ерусалим.«

¹⁸Ги подигнав очите, а тоа, ете, четири рога.

¹⁹И му реков на Ангелот, кој зборуваше со мене: што е ова? А тој ми одговори: »тоа се роговите што ги распрснаа Јуда, Израилот и Ерусалим.«

²⁰Потоа Господ ми покажа четири дрводелци.

²¹Пак реков: што ќе прават овие? А тој ми рече: оние рогови се што го распрснаа Јуда, така што никој од нив не може да си ја подигне главата; и, ете, тие дојдоа да ги уплашат, да им ги скршат роговите на народите, кои подигнаа рог против земјата на Јуда за да ја распрснат.