Read Свето Писмо (Гаврилова) 1990 Захарија 14 Bible Online

Захарија 14 - Свето Писмо (Гаврилова) 1990 bible

Захарија 14

¹Ете, настапува денот Господен кога ќе го разделат ограбеното од тебе пред тебе.

²Ќе ги соберам сите народи во војна против Ерусалим; градот ќе биде преземен, и домовите разгребени; жените ќе бидат обесчестени, половината од градот ќе отиде во ропство; но останатиот народ нема да биде истребен од градот.

³Тогаш ќе излезе Господ и ќе се сврти против тие народи, како што војуваше во борбен ден.

⁴И ќе застанат нозете Негови на Елеонската Гора во оној ден, што се наоѓа спроти Ерусалим од источната страна: и ќе се расцепи Елеонската Гора од исток кон запад со многу голема долина и половината ќе појде кон север, а втората половина кон југ.

⁵И вие ќе побегнете во долината на Моите гори, оти планинската долина ќе се протега до Асил; а ќе побегнете како што бегавте од земјотресот во деновите на Озија, царот Јудејски; и ќе дојде Господ, мојот Бог, и сите светии со Него.

⁶Во тој ден нема да има светила, светилата ќе бидат премавнати.

⁷Тој ден ќе биде единствен, познат само на Господа; ниту ден, ниту ноќ — само приквечер ќе се појави светлина.

⁸Во тој ден ќе потечат живи води од Ерусалим, половина кон источното море, а половина кон западното море; така ќе биде и лете и зиме.

⁹И Господ ќе биде Цар над целата земја; во тој ден Господ ќе биде единствен и името Негово — едно единствено.

¹⁰Целата таа земја ќе биде како рамнината од Гаваон до Ремон, јужно од Ерусалим, кој се извисил на местото свое и кој ќе се насели од портите Венијаминови до местото на првите порти, до Агловите порти, и од кулата на Ананеила до царските визби.

¹¹И ќе се населат во него, и проклетство нема да има повеќе, а Ерусалим ќе се наоѓа во безопасност.

¹²И ете какво ќе биде поразувањето, со кое Господ ќе ги порази сите народи, кои војувале против Ерусалим — телото на секого од нив ќе се исуши уште додека стои на нозете свои, и очите ќе му се стопат во длабнатините, и јазикот ќе му се исуши во устата негова.

¹³И во тој ден ќе завладее голем смут од Господа, така што еден друг ќе се фаќаат за раката своја и секој ќе ја подига раката своја против раката на ближниот свој.

¹⁴Но и Јуда самиот ќе војува против Ерусалим, и богатството на сите околни народи ќе биде собрано: злато, сребро и облеки во голем број.

¹⁵Таков пораз ќе има и врз коњите и маските, камилите и ослите, и врз секаков добиток, што ќе се наоѓа во куќите нивни.

¹⁶А потоа сите други што доаѓаат во Ерусалим, од сите народи, ќе доаѓаат од година во година, за да се поклонат на Царот, на Господа Саваот, и да го празнуваат празникот Сеници.

¹⁷И, ако некое од племињата земни не појде во Ерусалим, за да Му се поклони на Царот, на Господа Саваот, дожд нема да падне при нив.

¹⁸И, ако племето египетско не тргне на пат и не дојде тука, и тоа нема да добие дожд, па ќе го постигне пораз, со каков ги порази Господ оние народи, што не доаѓале да го празнуваат празникот Сеници.

¹⁹Ете што ќе стане за гревот на Египет и за гревот на сите народи, кои нема да дојдат да го празнуваат празникот Сеници.

²⁰Во тоа време дури на уздите од коњите ќе биде забележано »светиња на Господа«, и котлите во домот Господен ќе бидат како жртвените садови пред жртвеникот.

²¹И сите котли во Ерусалим и во Јудеја ќе бидат светиња на Господа Саваот, и ќе доаѓаат сите што принесуваат жртва, ќе ги земат и ќе варат во нив, и нема повеќе да има ниту еден Хананеец во домот на Господа Саваот во тој ден.