Read Свето Писмо (Гаврилова) 1990 Захарија 2 Bible Online

Захарија 2 - Свето Писмо (Гаврилова) 1990 bible

Захарија 2

¹И пак ги подигнав очите и видов: и, ете, еден маж, кој во раката имаше мерно јаже.

²Го прашав каде ќе одиш? Тој ми рече: одам да го измерам Ерусалим, за да видам колкава му е ширината и колкава му е должината.

³Тогаш ангелот, што зборуваше со мене, излезе, а друг ангел му дојде во пресрет,

⁴и тој му рече на оној: Побрзај и кажи му на оној млад човек — Ерусалим ќе се насели по селата поради многуте луѓе и добиток во него.

⁵И Јас ќе му бидам огнен ѕид, околу него, вели Господ, и ќе се прославам во него.

⁶Еј, еј! Бегајте од северната земја, вели Господ, зашто Јас ќе ве соберам од четирите ветра небески, вели Господ.

⁷Спасувај се Сионе, ти што живееш при ќерката Вавилонова.

⁸Зашто така вели Господ Седржителот, Кој ме прати за слава при народите, што ве плачкосуваа: »зашто кој ќе се допре до вас, ќе се допре до зеницата на окото Мое.

⁹И, ете, Јас ќе ја кренам раката Своја против нив, и тие ќе станат плен на слугите свои.« Тогаш ќе познаете дека Господ Саваот ме пратил.

¹⁰»Ликувај и весели се, ќерко Сионова, зашто ете, Јас ќе дојдам и ќе се населам во тебе«, вели Господ.

¹¹И ќе се приберат многу народи при Господа во оној ден и ќе станат Негов народ. И Он ќе се насели меѓу тебе, и тогаш ќе разбереш дека Господ Саваот ме пратил при тебе.

¹²Тогаш Господ ќе го земе во владение Јуда, Својот дел на светата земја, и пак ќе го избере Ерусалим.

¹³Нека молчи секоја плот пред лицето на Господа, зашто Он стана во облаците од Своето свето живеалиште.