Read Свето Писмо (Гаврилова) 1990 Малахија 4 Bible Online

Малахија 4 - Свето Писмо (Гаврилова) 1990 bible

Малахија 4

¹Зашто, ете, ќе настапи ден, кој гори како печка; тогаш сите горди и оние, кои постапуваат нечесно, ќе бидат како слама, и ќе ги изгори денот оние што иде, вели Господ Саваот; и така, нема да остане од нив ни корен, ниту гранчиња.

²А за вас, кои се боите од името Мое, ќе изгрее сонцето на правдата, и исцеление ќе има во зраците негови, и вие ќе излезете и ќе се разиграте како нахранети теленца;

³и ќе ги газите нечестивите, оти тие ќе бидат прав под стапалата на нозете ваши во тој ден, што јас ќе го приготвам, вели Господ Саваот.

⁴Помнете го законот на Мојсеја, слугата Мој, кому му заповедав на Хорив за сиот Израил, како и — правилата и наредбите.

⁵Ете, Јас ќе го пратам при вас пророкот Илија, пред да настапи денот Господен — големиот и страшниот.

⁶И тој ќе ги обрне срцата на татковците — кон децата нивни, и срцата на децата кон татковците нивни, па кога ќе дојдам, за да не ја поразам земјата со проклетство.