Read Свето Писмо (Гаврилова) 1990 2. Макавејска 11 Bible Online

2. Макавејска 11 - Свето Писмо (Гаврилова) 1990 bible

2. Макавејска 11

¹Сосема набргу Лисиј, царскиот роднина и намесник, поднесувајќи ги многу тешко и со голема огорченост последните настани,

²собра седумдесет илјади пешаци и коњаници и појде против Јудејците со намера Ерусалим да го направи елинска населба,

³и храмот слично на незнабожечките храмови, да го подложи на данок, а првосвештенството да се продава секоја година.

⁴Никако не помислуваше на Божјата сила, бидејќи се надеваше на множесвото пешаци и коњаници и на своите осумдесет слонови.

⁵Кога навлезе во Јудеја и наближи до утврденото место Ветсур, кое се наоѓа на пет стадии од Ерусалим, тој го опсади.

⁶Штом Макавеј и оние, кои беа со него, разбраа за опсадата на тврдината, почнаа да плачат и со солзи да Му се молат на Господа — да им испрати добар ангел за да ги спаси.

⁷А самиот Макавеј прв го зграби оружјето и ги поттикна другите заедно со него, изложувајќи се на опасност, за да им помогнат на браќата, и тие веднаш драговолно со него заедно појдоа во поход.

⁸Додека се наоѓаа уште близу до Ерусалим, веднаш им се покажа коњаник предводник, во бела облека, кој мафташе со своето златно ружје.

⁹Тогаш сите заедно Му заблагодарија на милосрдниот Бог и толку се охрабрија, готови да уништат не само луѓе, туку и диви ѕверови, па дури и железни врати да искршат.

¹⁰Одеа напред под закрила на небесниот соборец, кои им дојде од небото по милоста на Господа.

¹¹Јурнаа на непријателот како лавови, убија единаесет илјади пешаци и илјада и шестотини коњаници, а сите други ги натераа во бегство.

¹²Поголемиот дел од нив беа ранети, а се спасија голи и без оружје, а и самиот Лисиј се спаси со срамно бегство.

¹³Но, бидејќи сепак разумен, размислуваше за поразот што го претрпе, па сфати дека Јудејците се непобедиви, дека Сесилниот Бог е нивни соборец; затоа прати до нив да ги увери,

¹⁴дека е согласен со сите законски и правични услови за мир и дека ќе го убеди и царот да им биде пријател.

¹⁵Макавеј, имајќи ја предвид само користа, се согласи со сѐ што му предложи Лисиј, а и самиот цар одобри си што му предложи Макавеј на Лисија во писмо по однос на Јудејците.

¹⁶А писмото, што им го испрати Лисиј на Јудејците гласеше вака: »Лисиј го поздравува јудејскиот народ!

¹⁷Вашите пратеници Јоан и Авесалом ни го предадоа потпишаниот одговор, застапувајќи се за тоа што беше напишано во него.

¹⁸Јас го известив за тоа царот, со што требаше да го запознаам, а тој го одобри сето она што беше прифатливо.

¹⁹Затоа, ако и понатаму имате добро расположение спрема државната управа, јас ќе ви помагам за добро.

²⁰А што се однесува за подробностите, јас им порачав и на нашите и на вашите пратеници да водат преговори со нас.

²¹Останете со здравје! Сто четириесет и осма година дваесет и четврти ден од месецот Диоскор.«

²²А писмото од царот имаше ваква содржина: »Поздрав од царот Антиох до братот Лисиј.

²³Од времето, кога татко ми отиде при боговите, желба е — поданиците на нашето царство да не бидат вознемирувани, ако ги вршат своите работи.

²⁴Кога чувме дека Јудејците не се согласуваат со елинските обичаи на мојот татко; туку го сакаат својот сопствен начин на живеење и бараат да се раководат според своите посебни закони,

²⁵затоа, сакајќи тој народ да не биде вознемируван, заповедам нивниот храм да им биде вратен, така што да можат да живеат според обичаите на своите предци.

²⁶Затоа добро ќе направиш, ако испратиш кај нив пратеници, кои ќе склучат со нив договор, па така да ги знаат нашите намери, да бидат спокојни и да се занимаваат со своите работи.«

²⁷А царското писмо до јудејскиот народ имаше ваква содржина: »Царот Антиох до јудејските старешини и до сите Јудејци — поздрав.

²⁸Се надеваме дека сте здрави, како што ви посакуваме, а ние сме здрави.

²⁹Менелај ни соопшти дека сакате да се среќавате со ваши луѓе што живеат кај нас.

³⁰Затоа на оние, што ќе дојдат до триесеттиот ден од месецот Ксантик, им ја подавам мојата десна рака за да им ја потврдам нивната безопасност;

³¹Јуејците можат да се хранат со својата посебна храна и да се управуваат по своите закони, како и порани, никој веќе нема да ги вознемирува за грешките од минатото.

³²Јас го пратив кај вас Менелаја, за да ве успокои.

³³Бидете здрави! Во сто четириесет и осмата година на петанесеттиот ден од месецот Ксантик.«

³⁴На Јудејците им испратија писмо и Римјаните со следнава содржина: »Квинт Мемиј и Тит Манлиј, римски старешини, поздрав до јудејскиот народ.

³⁵Она што ви го дозволил Лисиј, царевиот роднина, тоа ви го потврдуваме и ние.

³⁶А за она, што тој сметал да му предложи на царот, размислете и вие добро, па испратете некого што побрзо за да можеме да направиме вам што ви е потребно, бидејќи ние веќе тргнуваме за Антиохија.

³⁷Затоа побрзајте и испратете некого, за да знаеме и ние што мислите.

³⁸Да сте живи и здрави! Во сто и четириесет и шестата година, на петнаесеттиот ден од месецот Ксантик.«