Read Свето Писмо (Гаврилова) 1990 3. Ездра 15 Bible Online

3. Ездра 15 - Свето Писмо (Гаврилова) 1990 bible

3. Ездра 15

¹Говори така, та Мојот народ да ги чуе зборовите на пророштвото, што ќе го вложам на твојата уста, вели Господ.

²и порачај тие да бидат напишани на хартија, зашто се верни вистини.

³Не плаши се, дека против тебе ќе кројат замисли и да не те вознемирува неверието на оние што говорат против тебе,

⁴секој што не верува, ќе умре во своето неверие.

⁵Ете, јас ќе испратам, говори Господ, неволји на земјата: меч, глад, смрт и погибел.

⁶зашто безбожноста на луѓето ја оскверни целата земја, нивните зли дела премногу се намножија.

⁷Затоа Господ рече:

⁸нема веќе да молчам за беззаконијата, што тие безбожно ги прават, нема веќе да го трпам она што тие зло прават; ете, невината и праведна крв вика кон Мене, а и душите на праведниците непрестајно викаат кон Мене.

⁹Ќе им одмаздам, вели Господ, и ќе ја земам од нив секоја невина крв.

¹⁰Ете, Мојот народ го водат како стадо на колење; нема веќе да трпам тој да живее во Египет,

¹¹но со силна рака ќе го изведам и со крената мишка ќе го казнам Египет со поразија како порано и ќе ја опустошам целата негова земја.

¹²Ќе заплаче Египет, ќе заплачат неговите основи, накажани со помор и одмазда, што ќе му ги испрати Бог.

¹³Ќе заплачат земјоделците, што ја обработуваат земјата, зашто нивните семиња ќе бидат уништени од гламја и страшна ѕвезда.

¹⁴Тешко му на светот и на оние што живеат во него,

¹⁵зашто се приближи мечот и нивното истребување; ќе се дигне народ против народ за војна и мечот е веќе во нивните раце,

¹⁶Луѓето ќе станат непостојани, едни со други ќе се победуваат, ќе почнат да не се грижат за својот цар, а началниците за текот на работите, што се под нивна власт.

¹⁷Ќе посака човек да појде в град, и не ќе може,

¹⁸зашто, поради нивната гордост, ќе востанат градовите, нивните куќи ќе бидат разурнати, а луѓето ќе бидат опфатени од страв.

¹⁹Нема да се смилува човек над своите ближни, предавајќи ги нивните куќи на разурнување со оружје, разграбувајќи го нивниот имот поради глад и многуте тешкотии.

²⁰Ете, Јас ги повикувам, говори Господ, сите земни цареви — од исток и југ, од север и Ливан, да се уплашат од Мене, да дојдат на себеси, за да ги казнам за она што тие им правеа на другите.

²¹Како што постапуваат тие со Моите избраници, така и Јас ќе постапам со нив; ќе им го вратам тоа во нивна пазува, вели Господ Бог.

²²Десницата Моја нема да ги поштеди грешниците и мечот Мој нема да престане да ги убива оние што пролеваат невина крв.

²³Ќе излезе оган од неговиот гнев и ќе ги уништи основите на земјата, и грешниците — како запалена слама.

²⁴Тешко им на грешниците и на оние што не ги исполнуваат Моите заповеди! вели Господ.

²⁵Нема да ги поштедам. Бегајте од Мене синови отстапници, не осквернувајте ја Мојата светиња.

²⁶Господ ги знае сите што грешат против Него; затоа ги предаде на смрт и на убивање.

²⁷На земјината топка веќе започнаа маките; вие во нив ќе останете. Бог нема да ве избави, зашто згрешивте пред Него.

²⁸Еве, страшно видение, а неговото лице е од Исток.

²⁹Ќе излезат рожби на арабиските змии врз многу бојни коли, брзи како ветар, што ќе се прошират по земјата; ќе внесат страв и трепет кај сите што ќе чујат за нив.

³⁰Ќе излезат како диви свињи од Кармонскат гора, разбеснети во својата жестина; тие ќе дојдат со голема сила и ќе стапат во борба со нив.

³¹Потоа змиите, спомнувајќи си за своето потекло и имајќи голема сила, ќе победат и ќе се свртат да ги гонат оние.

³²Тие ќе се збркаат, ќе молкнат пред нивната сила и ќе ги свртат нозете свои во бегство.

³³Но сокриениот во заседа од страна на Асиријците ќе ги заобиколи и ќе убие еден од нив; во нивната војска ќе се појави страв и трепет, како и негодување против нивните цареви.

³⁴Еве облаци од исток и од север до југ; видот им е многу страшен, полн со жестокост и бура.

³⁵Тие ќе се судрат едни со други и многу ѕвезди ќе паднат на земјата; ќе падне и нивната ѕвезда, а од меч ќе биде пролеана крв дури до утробата,

³⁶и гној човечки ќе достигне дури до седлото на камилата; страв и голем трепет ќе има по земјата.

³⁷Ужас ќе ги опфати сите, што ќе го видат тој гнев, и ќе затреперат.

³⁸Потоа многупати ќе се издигнуваат бури од југ и од север, а понекогаш и од запад.

³⁹Силни ветрови ќе се кренат од исток и ќе го откријат и облакот, што го подигнав Јас во Својот гнев; а ѕвездата, што е одредена да внесува страв кога дува источен и западен ветар, ќе се повреди.

⁴⁰И ќе се подигнат облаци, големи и силни, полни со свирепост, ќе се подигне и ѕвезда, за да ја уплаши земјата и нејзините жители, па ќе ја излијат таа страшна ѕвезда на секое високо и возвишено место;

⁴¹оган и град, мечеви што летаат и многу води, за да ги наполнат сите полиња и сите извори со множество води;

⁴²ќе ги покријат со вода и градот и ѕидините, горите и ридовите, дрвјата во горите, тревата во ливадите и нивните житни растенија;

⁴³и ќе поминат, а да не се сопираат, до Вавилон и ќе го уништат;

⁴⁴ќе се соберат кај него и ќе го опседнат; против него ќе ја излејат ѕвездата и сета јарост врз него. И ќе се крене прав и дим до самото небо, и сите наоколу ќе го оплакуваат.

⁴⁵А оние што ќе останат подвластени под него, ќе им служат на оние што внесоа страв.

⁴⁶И ти, Азијо, соучесничко во надежта и славата на Вавилон,

⁴⁷тешко ти и горко ти што си станала слична на него, што си ги украсувала своите ќерки со блуд, за да им се допаѓаат на своите љубени и да бидат славни пред нив, на оние кои отсекогаш сакале да вршат блуд со тебе.

⁴⁸Ти се угледа на замразениот во сите негови дела и преземања.

⁴⁹Затоа, вели Господ, ќе испратам врз тебе зла: вдовство, сиромаштија и глад, меч и рана, за да бидат опустошени твоите куќи со насилство и смрт.

⁵⁰Славата на твојата сила ќе се исуши како цвет — кога ќе настане жега, испратена врз тебе.

⁵¹Ќе изнемогнеш како просјачка, биена и покриена со рани од другите жени, за да не можат да те примат големи луѓе и миленици.

⁵²Сакав ли да те мразам така, вели Господ,

⁵³ако ти не беше ги убивала Моите избрани во секое време, кревајќи раце да ги убиваш и лажно жалеше над нивната смрт тогаш кога беше пијана.

⁵⁴Украсувај го твоето лице;

⁵⁵наградата за твојот блуд е во твојата пазува; затоа ти ќе добиеш казна.

⁵⁶Како што постапуваше со Моите избраници, вели Господ, така со тебе ќе постапи Бог;

⁵⁷твоите деца од глад ќе загинат, ти ќе паднеш од меч, твоите градови ќе бидат уништени и сите твои ќе паднат од меч на бојното поле,

⁵⁸а оние што се по горите ќе загинат од глад и ќе јадат од своите меса поради недостиг на леб и ќе пијат крв поради немање вода.

⁵⁹Во својата немоќ ќе појдеш по морињата, но и таму ќе сретнеш неволји.

⁶⁰Додека ти ќе талкаш по туѓите земји, тие ќе навлезат во твојот опустошен град и ќе уништат еден дел од твојата земја, ќе уништат и еден дел од твојата слава.

⁶¹Разурната, ти ќе бидеш за нив слама, а тие за тебе ќе ти бидат оган;

⁶²тие ќе те уништат тебе, и твоите градови, и твојата земја, и твоите гори, и сите твои шуми и плодните дрвја со оган ќе ги изгорат;

⁶³синовите твои во ропство ќе ги одведат, имотот твој ќе ти го ограбат и славата твоја ќе ја уништат.