Read Свето Писмо (Гаврилова) 1990 Матеј 1 Bible Online

Матеј 1 - Свето Писмо (Гаврилова) 1990 bible

Матеј 1

¹Книга за родословот на Исуса Христа, син Давидов, син Авраамов.

²Авраам го роди Исака, Исак го роди Јакова, а Јаков го роди Јуда и браќата негови;

³Јуда го роди Фареса и Зара од Тамар; Фарес го роди Есрома, а Есром го роди Арама;

⁴Арам го роди Аминадава; Аминадав го роди Наасона, а Наасон го роди Салмона;

⁵Салмон го роди Вооза со Раав; Вооз го роди Овида со Рут, а Овид го роди Јесеја;

⁶Јесеј го роди цар Давида, а цар Давид со поранешната Уриева жена го роди Соломона;

⁷Соломон го роди Ровоама; Ровоам го роди Авија, а Авија го роди Аса;

⁸Аса го роди Јосафата; Јосафат го роди Јорама, а Јорам го роди Озија;

⁹Озија го роди Јоатама; Јоатам го роди Ахаза, а Ахаз го роди Езекија;

¹⁰Езекија го роди Манасија; Манасија го роди Амона, а Амон го роди Јосија;

¹¹Јосија го роди Јоакима; Јоаким го роди Јехонија и браќата негови за време преселувањето во Вавилон.

¹²А по Вавилонското преселување Јехонија го роди Салатиила, а Салатиил го роди Зоровавела;

¹³Зоровавел го роди Авиуда; Авиуд го роди Елијакима, а Елијаким го роди Азора;

¹⁴Азор го роди Садока; Садок го роди Ахима, а Ахим го роди Елиуда;

¹⁵Елиуд го роди Елеазара; Елеазар го роди Матана, а Матан го роди Јакова;

¹⁶Јаков го роди Јосифа, мажот на Марија, од која се роди Исус, наречен Христос.

¹⁷И така, сите родови од Авраама до Давида се четиринаесет; и од Давида до Вавилонското преселување се четиринаесет родови; а и од преселувањето Вавилонско до Христа — родови четиринаесет.

¹⁸А раѓањето на Исуса Христа стана вака: по свршувачката на мајка Му Марија за Јосифа, уште пред да се состанат, се виде дека е тешка од Светиот Дух.

¹⁹А Јосиф, нејзиниот маж, бидејќи праведен, не сакаше да ја посрами и намисли тајно да ја отпушти.

²⁰Но, штом помисли така, ангел Господов му се јави насон и рече: »Јосифе, син Давидов, не бој се да ја примиш Марија, жената своја, зашто зачнатото во неа е од Светиот Дух;

²¹Таа ќе роди Син и ќе Му ставиш име Исус, зашто Он ќе го спаси народот Свој од неговите гревови.«

²²А сето тоа стана за да се исполни кажаното од Господа преку пророкот, кој вели:

²³И ете, девица ќе зачне во утробата своја и ќе роди Син, и ќе го наречат Емануил — што значи: со нас е Бог!

²⁴Штом се разбуди Јосиф од сонот, направи така како што му беше заповедал ангелот Господов и ја прими жената своја.

²⁵И не се доближи до неа, додека таа не Го роди својот првороден Син и Го нарече Исус.